Xixón acueye esti xueves una manifestación contra la represión

Baxo’l lema ‘O movémosnos o cómennos’ van salir esti xueves a la cai los sindicatos CSI, SUATEA, CNT y CGT. La manifestación contra la represión va partir de la plaza xixonesa de L’Humedal a les 19.30 hores.

“N’Asturies y nel Estáu español hai centenares de persones deteníes, encausaes, multaes, firíes o mancaes, actuaciones policiales brutales, allanadures de sedes sindicales, ataques a derechos de xunta y manifestación, presiones a la hora d’exercer el derechu de fuelga, etc. La represión yá ye xeneralizada y pue cayer sobre cualisquier persona que realice cualisquier triba protesta. Les llibertaes sindicales y ciudadanes entamen a ser parte’l pasáu, demientres les Delegaciones de Gobiernu y la Policía actúen con total impunidá”, afirmen dende la Corriente Sindical d’Izquierda (CSI), ún de los sindicatos convocantes.

Pela so parte, la CNT recuerda la represión vivida nes fuelgues xenerales pasaes, sobre manera na última, xornada na que dellos militantes de la CSI foron deteníos en Xixón y na que la Policía entró pola fuercia na Casa Sindical de la ciudá. “Esi día foi la fuercia del pueblu xuníu la que-yos sacó de Comisaría, dando exemplu de solidaridá y apoyu mutuu. Por eso queremos convocar esta manifestación, porque ye’l pueblu xuníu’l que tien que defender a los suyos. Por eso llamamos a toos a acudir y a amosar el so sofitu públicu a los nuesos compañeros”, afirmen los anarquistes. La marcha va partir a les 19.30 hores de L’Humedal.