Xera entra nel estudiu pa grabar 'Llume', el so tercer discu

La banda de folk-electrónicu Xera yá ta trabayando na grabación del so tercer discu, ‘Llume’, que tará a disposición de los sos siguidores pal branu. Martin Russell, téunicu d’Afro Celt Sound System, encargaráse del master.
 
Los miembros de Xera entraron nel estudiu esta fin de selmana pa dar forma a esti llarga duración nuevu trés años depués de l’asoleyamientu de ‘Tierra’, discu qu’ayudó a esta banda asturiana a dar el saltu hacia Europa, como amuesen les salides continues nestos años últimos a conciertos y festivales de Portugal, Italia, Breizh, Alemaña o la República Checa, ente otros. Tres terminar el trabayu nos Estudios CasaCaída, Xera va unviar la mezcla a Londres pa que Martin Russell, téunicu d’Afro Celt Sound System, s’encargue del master.
 
La intención de la banda ye que, pa finales de mayu, pueda entamase la duplicación del discu pa que, pa primeros de branu, pueda tar a disposición de los sos siguidores en venta direuta y en descarga llibre na web de Xera. Al igual que los dos discos anteriores, ‘Lliendes’ (2006) y ‘Tierra’ (2009), y fiel a la filosofía del grupu , ‘Llume’ va acoyese a la llicencia Creative Commons (by - nc - nd 3.0).