Xera actúa esti martes nel escenariu central de la ‘Semana Negra’

A les 22.30 hores d’esti martes, el grupu de folk-electrónicu Xera va actuar nel escenariu central de la ‘Semana Negra’. El domingu, los ganadores del Premiu al Meyor Cantar del 2010 van repetir conciertu na Nueche Celta de Granda.
 
La ‘Semana Negra’ más asturiana no musical da pasu esta nueche a l’actuación de Xera, banda que tien un currículum ampliu con dos discos espublizaos, ‘Lliendes’ (2006) y ‘Tierra’ (2009), y un bon númberu de conciertos per toda Europa. Cola incorporación de los músicos Sara Muñiz (teclaos), Xuan Naveiras (gaita y xiblates) y Chus Porrúa (téunicu y collaborador de percusión), el grupu vive una etapa nueva ensin perder la fuercia qu’amuesen siempre sobre l’escenariu.
 
Tres esti conciertu, Xera va principiar un ciclu d’actuaciones que nel mes próximu va llevalos fuera de les nueses llendes, anque primero van participar el domingu na XV Nueche Celta de Granda xunto con Brandal y la banda bretona Latira. Pal 19 d’agostu, los asturianos tienen confirmada la so presencia XVI Folk Plasencia, pal día siguiente xubir hasta Galicia y actuar nel XII Festival de Guísamo en Bergondo (A Coruña). Por último, el 29 d’agostu van llevar la so música a la Île de Tatihou, en Normaundie, al festival Les Traversées de Tatihou.