Xentiquina vuelve a sonar en directo en Xixón

La Oficina de Normalización Llingüistica de Xixón organiza, dientro de los actos de celebración del so venti aniversariu, el conciertu-homenaxe a Nacho Fonseca 'Canciones pa la Xentiquina' .

L’actu, qu’entamará mañana a les 12 hores nel patiu del Centru de Cultura Antiguu Institutu, será mui especial ya que contará cola música en directo d’una banda formada pa la ocasión polos conocíos músicos asturianos David Varela, Cristina Montull, David Casillas y Alicia Álvarez, y la collaboración especial del coru escolar del C.P. Cabueñes dirixíu por Laura Peláez Méndez y formáu por venti escolinos y escolines.

Nesti actu repasaránse dellos de los cantares emblemáticos d’esti autor referencial, pioneru y precursor de la música asturiana y de la tresmisión de la llingua asturiana dende que na década de 1980 fora l’impulsor, siendo maestru d’escuela, de los proyectos musicales y educativos de Seliquín y Xentiquina. Anguaño, Nacho Fonseca coordina el programa de la Fundación Municipal de Cultura “Cantar presta muncho” qu’esti 2024 algama la so undécima edición.

El conciertu, amás, celébrase tres la publicación recién del llibru-discu 'Canciones pa la Xentiquina. Una selección sentimental de Nacho Fonseca', que recueye les lletres y música orixinal que sonará nesti conciertu y que foi espublizada pol sellu 'La Fabriquina, creaciones culturales' , que lleva años trabayando na creación de materiales musicales y lliterarios n’asturianu pa la reciella. Les ilustraciones qu’acompañen les lletres son autoría de l’artista asturiana Laura Lara (Bitxo).

L'actu contará con una pequeña charra previa col autor conducida pola editora del llibru, la periodista y música Alicia Álvarez, y tres l’actuación Nacho Fonseca firmará exemplares. La entrada será de baldré hasta completar aforu.

Con esti conciertu homenaxe preténdese que los cantares de Fonseca que marcaron a delles xeneraciones de neños y neñes asturianes vuelvan a actualizase y reinterpretase llegando a audiencies nueves pa que la llingua asturiana se caltenga y s’esparda.