“Xenerosidá y convicción constitucional pa negociar la oficialidá”, el pidimientu de l’ALLA a los partíos

FSA, Podemos, IX y Foro van negociar dende esta selmana la reforma estatutaria col 1 de febreru como fecha llende. "Tamos énte una de les caberes oportunidaes pa solucionar democráticamente’l que ye’l gran tema políticu pendiente dende la Transición n’Asturies: la cuestión llingüística”, recuerda l’Academia de la Llingua Asturiana (ALLA), que pide “xenerosidá y convicción constitucional pa negociar la oficialidá”.

La institución académica asoleyó esta mañana un comunicáu nel que reclama a les cuatro fuercies dispuestes a entamar una reforma del Estatu qu’incluya la oficialidá “que planteguen la negociación y el consensu priorizando’l futuru cultural d’Asturies sobre otres llexítimes aspiraciones partidaries en rellación col desarrollu social, económicu y políticu de la nuesa comunidá. Protexer y da-y futuru a les llingües d’Asturies ye, en tou casu, un elementu de cohesión, dinamización y autoestima coleutiva qu’incide en toles dimensiones de desarrollu futuru p’Asturies”.

“De nun llograse agora, xeneraríase, ensin dulda, una gran frustración n’amplios sectores de la sociedá asturiana nos que s’instalaría’l desánimu y una fonda sensación d’inxusticia en cuantes a la non reconocencia de los sos derechos culturales en comparanza colos que sí puen esfrutar les ciudadaníes gallega, vasca, navarra, aranesa, catalana, valenciana y balear”, argumenta l’ALLA, que considera amás que, “dende’l puntu de vista sociolóxicu, proyeutaríase una imaxe escura onde la estratexa y les consignes del arcu políticu señaldosu de la dictadura trunfa sobre una mayoría social abierta, democrática, moderna ya inclusiva”. La responsabilidá de llegar a un alcuerdu cai nestes cuatro fuercies polítiques, consensu al que la institución espera sumar nel momentu d’aprobar la Llei d’Usu que desendolque la oficialidá al PP –“ési ye’l nuesu enfotu”–, pero la institución cree que “tien inda más significáu polo que respeuta a la FSA-PSOE, fuerza mayoritaria na Xunta Xeneral y fuerza de gobiernu n’Asturies”, considerando fundamental “la implicación personal del Presidente Barbón y el so lideralgu pa llograr que’l procesu fine con éxitu”.

Les negociaciones van desendolcase a lo llargo d’esti mes cola intención de pautar una propuesta de reforma del Estatutu d’Autonomía qu’entre’l 1 de febreru na Xunta Xeneral pa entamar asina cola so tramitación. Los plazos yá tán mui axustaos y l’ALLA, una vegada más, ufre “la so disposición p’ayudar, nel so casu, al llogru efeutivu de la oficialidá”.

Na semeya, llibrería de l'ALLA estrenada recién.