Xeitu, proyeutu d'inclusión social y llaboral con nome n'asturianu

Celebróse una xornada de trabayu na Conseyería de Facienda sobre esta iniciativa a implantar en Xixón, Mieres y Tinéu que pretende beneficiar a 500 persones.

'Xeitu-Estratexes innovadores pa la inclusión activa al traviés de partenariaos llocales integraos' ye ún de los nueve proyeutos escoyíos pola Comisión Europea en tol territoriu comunitariu pa recibir financiación del Programa Européu d'Emplegu y Innovación Social y l'únicu que se va desenvolver n'España, polo que se considera crucial pa la configuración y reforma de les polítiques d'inclusión activa en tol Estáu. Promueve la inclusión social y llaboral d'aquelles persones qu'encaren riesgos críticos en términos de desemplegu y esclusión y va implantase de forma pilotu nestos trés conceyos pa estendelo depués a toa Asturies si s’algamen los oxetivos propuestos.

El so plazu d'execución establecióse en 30 meses, polo que va rematar en xunu del 2024. Nesi periodu el mediu millar de persones participantes, que reciben rentes mínimes (salariu social o infgrsu mínimu vital) o tienen dificultaes series p'acceder a un trabayu, van disponer de recursos nel ámbitu de la renta, la busca d'emplegu y l'accesu a bienes y servicios pa superar les barreres que torguen el so accesu al mercáu llaboral.

El Gobiernu, al traviés de la Conseyería de Derechos Sociales y Bienestar, lidera esta aición que cuenta con una inversión de 1,28 millones de fondos europeos, na que tamién participen como socios el Serviciu Públicu d'Emplegu del Principáu d'Asturies (SEPEPA), el Ministeriu d'Inclusión, Seguridá y Migraciones, los ayuntamientos de Tinéu, Mieres y Xixón, la European Social Network y Cruz Bermeya Asturies. Amás, collaboren como entidaes acomuñaes la Federación Asturiana d'Empresarios (FADE), l'Institutu de Desarrollu Económicu del Principáu d'Asturies (IDEPA) y la Rede Europea de Llucha contra la Probeza y l'Esclusión Social (EAPN-Asturies).

Resultaos a trés niveles

"El proyeutu Xeitu tien que ver con aquelles persones que tán más alloñaes del mercáu llaboral, d'eses posiblidaes d'inclusión social", esplicó esta mañana Melania Álvarez García, conseyera de Derechos Sociales y Bienestar". Los oxetivos esperaos son un ameyoramientu significativu de les condiciones de vida de los participantes, inclusive la so incorporación social y llaboral completa; l'aumentu de la calidá de les intervenciones pa la inclusión per aciu d'una aición coordinada, lo que contribuyirá tamién a aumentar la sostenibilidá del sistema autonómico de derechos sociales; y el refuerzu de la cohesión social y la resistencia de tola sociedá asturiana.

Na semeya, Álvarez y Milagros Paniagua, secretaria xeneral d'Oxetivos y Polítiques d'Inclusión y Previsión Social del Ministeriu d'Inclusión, Seguridá Social y Migraciones, esta mañana na xornada de trabayu celebrada nel salón d'actos de la Conseyería de Facienda. Tamién participaron les direutores xenerales de Planificación, Ordenación y Adaptación al Cambiu Social, Ana Fernández, y de Xestión de Derechos Sociales, Paula Álvarez.