Xeira y Academia de la llingua celebraron conxuntamente’l "Día das Lletras"

L'asociación Xeira y l'Academia de la Llingua Asturiana celebraron conxuntamente esti fin de selmana en A Roda'l Día da Lletras del Navia-Eo. L'actu, al qu'asistió l'alcalde de Tapia, centróse nel homenaxe a la figura del escritor eonaviegu Jacinto Díaz, muertu'l branu pasáu y autor con Manuel García-Galano d'un vocabulariu del so llugar de nacencia, A Roda, y del que l'académicu Antonio Vior fexo una pequeña estampa de la so vida. D'otra manera presentóse tamién nel actu la edición en gallego-asturianu de la obra ¡Esta é a mía casa!, cuentu d'Enrique Carballeira Melendi publicáu primero n'asturianu dientro de la coleición «Escolín» y qu'agora fai'l númberu 8 de la coleición «Os llibros d'Entrambasauguas» na so versión na fala.

Nel actu hebo discursos d'Ana Cano, en representación de l'Academia de la Llingua, y de Xabiel G. Menéndez, en representación de l'asociación de defensa del gallego-asturianu Xeira. Ana cano dedicó la so intervención a reafirmar la llexitimidá de l'autoridá de l'ALLA nel Navia-Eo, mientres que Xabiel Menéndez, que pidió que l'ALLA camudare'l so nome pol de "Academia de les llingües d'Asturies", centróse n'atacar los intentos que dende dellos medios de comunicación diz quese ficieron pa crear una falsa polémica cola normalización de la toponimia Eonaviega. Según Menéndez, dellos medios dedicáronse nestes selmanes a engrandecer y magnificar les opiniones residuales y poco representatives que salieron al rau del decretu d'oficialización de los topónimos del Conceyu de El Franco.