Xeira entregó los sos premios lliterarios

L'asociación de defensa de la fala eonaviega entregó esta selmana'l so premiu lliterariu, que ganó l'autora de Castripol Ágata García Castro pol relatu "gol".

Al actu d'entrega d'esti premiu lliterariu, que llegó con esta a la so 14ª edición asistieron el director de política llingüística Ramón d'Andrés y l'alcalde de Castripol José Ángel Pérez, que, na so intervención fecha en gallego-asturianu aprovechó la presencia de d'Andrés pa comprometese a facer más coses en materia de señalización toponímica y documentación municipal billingüe, amás de dar a entender que diba pidir l'informe toponímicu a la Xunta de Toponimia.

D'Andrés y Pérez nun foron les úniques autoridaes qu'axuntó Xeira nel actu, al que tamién asistieron l'alcaldesa del Franco y el d'A Veiga. Amás de la entrega del premiu, hebo tamién un discursu del presidente de Xeira, Xabiel G. Menéndez nel que se fizo un repasu a la situación de la fala y los retos que tien esta pal futuru.

El responsable de l'asociación entamó con ironía faciendo referencia a la iniciativa retirada pol PSDG que pidía financiar vacaciones en Galicia pa los eonaviegos declarando Xabiel que "Eu pensaba qu'hoi nun íbamos poder tar aquí porque xa cuntábamos con úas vacacióis con todo pago en Sanxenxo pr'aprender algo da vecía y sempre querida llingua gallega, peró pinta qu'al cabo a cousa quedóu en augua d'hovos". Darréu Xabiel Menéndez fizo un repás en términos positivos a la situación del gallego-asturianu nos 14 años de funcionamientu de l'asociación nel que destacaron l'aumentu de la escolarización del gallego-asturianu, un esfuerzu educativu que dende l'añu pasáu lléga-yos tamién a los adultos.

D'otra manera, Xabiel Menéndez sorrayó'l valor d'actualidá que ta garrando l'Eo-Navia mostrando la so alegría porque "nunca como agora houbo tantos trabayos d'investigación sobre todas as veiras da nosa realidá cultural … y feito todo na llingua nosa y por xente da terra. Ei tán, pa proballo, as Segundas Sesióis d'Estudio del Occidente qu'a Secretaría Llingüística del Navia-Eo fexo hai pouco na Caridá".

Ello xunta'l procesu de normalización de la toponimia eonaviega y l'espardimientu del usu de la Fala nes televisiones y radios locales lleva al representante de Xeira a opinar que "todo este feixe de novedades, impensables hai quince ou vente anos, llogróu qu'a nosa llingua chegara a us niveles de prestixo y consideración, a lo menos sobre el papel según deixan ver as encuestas sociollingüísticas feitas na zona, ben bus".

Xabiel Menéndez condenó na so intervención "ás salidas de tono de dalgús qu'intentan, con cuatro tópicos esencialistas basaos en mitos y falsedades, negar a realidá al esqueicer os sentimentos y a voluntá da población" en referencia a los manifiestos que dacuando vienen de la otra parte de la ría del Eo. Sicasí, el problema más grave que ve Xeira na supervivencia del gallego-asturianu nun ye otru que la perda de tresmisión xeneracional de la fala. Pa Xabiel Menéndez "As palabras que formaron parte da vida da nosa xente y de nosoutros mesmos xa nun las dicen os nosos nenos. Y eso é a morte d'úa llingua. Sei que pode parecer que tou dramatizando, peró a situación é realmente desesperada" rematando'l discursu con un llamamientu a les autoridaes asturianes "pa qu'os que falamos a llingua que s'oi nestas terras dende hai tantos siglos nun nos sintamos minorizaos, forasteiros na nosa propia casa" daqué que pasaría necesariamente por "a oficialidá".