Xeira abre la convocatoria del XXII Premio de Narracióis Curtias

|

L’Asociación Culturar Xeira ta acabante d’abrir la convocatoria del Premio de Narracióis Curtias que lleva’l so nome. Ésti vive la so vixésimosegunda edición pese al “momentu difícil” que ta pasando la lliteratura en gallego-asturiano.

Según espliquen dende’l coleutivu que trabaya pola cultura del Navia-Eo, la lliteratura de la zona “depende das axudas das institucióis pola súa situación sociollingüística tan dellicada. Con úa escolarización en precario, con poucos llectores y con úa promoción normalizadora na sociedá mui escasa, estos tempos de crisis y recortes nun axudan precisamente”. Nesi sen, apunta que recibió “úa axuda da Conseyeiría d’Educación, Cultura y Deporte de 675 euros pral premio y prá carteleiría del acto” na convocatoria de subvenciones p’asociaciones, concesiones que se fixeron públiques nel BOPA esta selmana.

Pese a esta situación, Xeira mantién el so apueste por esti concursu lliterariu, el más veteranu de los que s’entamen en gallego-asturianu, nacíu hai 22 años “pra promocionar el uso culto da llingua del estremo occidental asturiano”. Asina, mantién una recompensa de 600 euros pal ganador, qu’inscribirá’l so nome xunto col de figures como Manolo Galano, Alejandro Antúñez, Jacinto Díaz, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas, Alfredo de Ponticella, Marisa López Diz y Miguel Rodríguez Monteavaro, ente otros. El vencedor de la edición anterior foi’l naviego Alberto Castro Gión gracies a la obra ‘Inverno’.

Les persones interesaes en participar nel  XXII Premio Xeira de Narracióis Curtias han d’unviar les sos creaciones en prosa, por cuadriplicao y sistema de plica, al apartáu de correos númberu 5 d’A Caridá (El Franco). El plazu d’entrega de los orixinales final’l vienres próximu, 26 d’ochobre.

 

Contador Estadistiques