Xega denuncia un casu nuevu de discriminación a una muyer lesbiana que quier ser madre

La Unidá de Reproducción Asisitida denegó a una muyer la medicación necesaria pal tratamientu pa ser madre. Al igual qu’asocediera hai delles selmanes, la razón d’esta decisión ye la condición sexual d’esta muyer, según Xega.
 
Silvia G., vocal del Área de Lesbiana y miembru de la xunta direutiva del coleutivu que representa a les lesbianes, gais, transexuales y bisexuales d’Asturies, ye la persona afectada nesta ocasión. La razón dada dende Salú ye la mesma que nel casu de Andrea, la mierense que tien prevista una reunión col conseyeru pal día 4 de mayu: “Nun hai infertilidá d’home”. Hai que destacar que, enantes d’esta decisión de la Unidá de Reproducción Asistida del Principáu, Silvia G. yá recibiera la conformidá d’Atención Primaria y del Serviciu de Xinecoloxía del Hospital San Agustín d’Avilés.
 
El 18 d’abril pasáu foi’l día nel que la vocal del Área de Lesbiana de Xega recibió, de forma verbal, la comunicación del xefe de serviciu de la Unidá la orde “de la Conseyería de Salú y Servicios Sanitarios de nun admitir a nenguna lesbiana, nin muyeres soles”, aseguren dende’l coleutivu. Por ello, Xega considera qu’esti segundu casu de discriminación supón un respaldu a la decisión de Jaime Sánchez, Inspeutor de Prestaciones de Mieres, polo que reclama a la conseyería “un pronunciamientu públicu esplícitu” sobre la situación d’estes dos muyeres.
 
Otra manera, dende’l coleutivu se lamenta que nin María José Ramos, conseyera de Presidencia, Xusticia y Igualdá, nin María Fernández Campomanes, direutora del Institutu Asturianu de la Muyer, “se pronunciaren sobre estos casos”.