Xapón, lloñe d’un desastre nuclear similar al de Chernobil

L'Axencia Internacional de la Enerxía Atómica (AIEA), en pallabres del so xefe, Yukiya Amano, cree “improbable” un desastre nuclear como’l de Chernobil en Xapón. El país nipón sufrió un terremotu y un tsunami posterior el vienres.
 
“Ye improbable que puea dase un accidente” como'l de Chernobil, sorrayó Amano, de nacionalidá xaponesa, mientres una rueda prensa en Viena. Nesti sen, insistió en qu'esisten delles diferencies ente dambos incidentes, ente elles de diseñu y estructura de les instalaciones. El xefe d’AIEA apuntó amás que les vasixes de los reactores nucleares afectaos tán intactes y que la radiación emitida ye llendada.
 
Ello nun quita pa que trabayadores y ciudanos tean afectaos poles consecuencies en cuatro centrales nucleares del país del terremotu de 8,9 graos na escala Richter que tuvo llugar el vienres. Munchos d’ellos tuvieron espuestos a radiación tres unes esplosiones na planta de Fukushima-1.