Xapón eleva’l nivel d’alerta nuclear por Fukushima de cuatro a cinco

La situación en Xapón pol estáu de la central nuclear de Fukushima llevó al Gobiernu a xubir el nivel alerta de cuatro a cinco. La escala d’alerta nuclear va del un al siete, situación ésta última de la que namái se dio un casu: Chernóbil.
 
L’Agencia Internacional de la Enerxía Atómica (AIEA) anunció la decisión de les autoridaes xaponeses d’elevar el nivel d’alerta nuclear de cuatro a cinco; esto ye, defínelu como un ‘accidente con consuecuencies d’alcance mayor’. D’esta forma, la situación de los reactores de la central nuclear de Fukushima, afeutada pol terremotu y el tsunami posterior del vienres pasáu, ta al mesmu nivel que l’accidente na central de Three Mile Island, cerca de Harrisburg (Pennsylvania, Estados Unidos), acontecíu nel 1979.
 
Les midíes por evitar una fusión del nucleu de dalgunos de los reactores pasen agora por llanzar agua dende camiones cisternes sobre’l númberu tres de la central nuclear. Según informa l’Axencia de Seguridá Nuclear de Xapón, los niveles de radiación nún de los puntos de medición de la central descendieron de manera considerable pela mañana –madrugada n’Asturies–. Ayeri, los trabayos dende l’aire con helicópteros, que tuvieron que detenese pola radiación alta sobre la central, malpenes consiguieron reducir los índices de contaminación.
 
El reactor númberu tres, l’únicu que contién plutoniu, ye ún de los que más problemes presenta tres el terremoto y el tsunami. Nestos ocho díes sufrió una esplosión y emitió una gran cantidá de vapor, lo que fai temer una fusión parcial eventual del so nucleu.