Xandru Fernández, ganador del premiu Trabe de Narrativa

El xuráu del Premiu Trabe de Narrativa dio a conocer esti xueves 9 de febreru pela mañana'l fallu de la edición 2005 d'esti concursu, ún de los que meyor dotación en premios tienen dientro de la lliteratura n'Asturianu y que volvía a convocase tres 10 años d'ausencia. L'escritor de Turón Xandru Fernández foi'l ganador d'ente los 11 trabayos que se presentaron cola novela "La banda sonora del Paraísu".

Contada al traviés de la narración en primera persona que fai un amigu del protagonista qu'intenta reconstruir y entender la so trayectoria vital, "La Banda Sonora del paraísu" allega al llector a la vida de Fidel, fíu d'un mineru y una hippie n'Asturies de 1970. Como si esi nacimientu determinara la so personalidá, la so vida hasta'l presente recuerre un camín irregular pero coherente, pasando de delincuente xuvenil aficionáu al rock y al sadomasoquismu, ermitañu cultivador de plantes alucinóxenes, guerrilleru na revuelta de Chiapas a cazador y ermitañu peles viesques d'Asturies, pasando per esperiencies como ser inspirador d'una comuna anarquista.

El xuráu sorraya que la novela de Xandru Fernández fai "un mui guapu retratu de la sociedá asturiana de los últimos años nesta novela moderna, que tien muncho de novela negra, y na que nun falten nin les referencies a la sicodelia o la crítica xeneracional al primer asturianismu, nin los retratos de les sociedaes indíxenes mexicanes o de Bosnia na posguerra" ensin perder la perspectiva de "reconstruir les vides de los protagonistes dientro d'una identidá colectiva".

Nacíu en Turón nel 1970, Xandru Fernández ye Profesor de Filosofía nel institutu de Lluanco. Dende 1990 vien desarrollando'l so llabor como narrador y poeta n'Asturianu, contando colos principales premios na lliteratura del país, ente ellos ser dos vegaes ganador del "Xosefa Xovellanos" de novela, el premiu de narrativa de l'Academia, el "Xuan María Acebal" de poesía y, apocayá, el premiu de la crítica que concede l'Asociación d'Escritores Asturianos (AEA) pola so novela Les ruines.

Amás de la so obra poética, qu'entamó nel añu 1990 col so primer llibru de poemes, "Primer bestiariu" al que siguen "Breviariu de la diáspora" (1993), "Lletra muerto" (1998, premiu "Elvira Castañón" de poesía) y "Servidume" (premiu de poesía «Xuan María Acebal» del año 2000), Xandru Fernández foi publicando una amplia obra narrativa, rescamplando les noveles "El silenciu en fuga" (1990, premiu de "Novela Curtia" de l'Academia), "Tráficu de cuerpos" (1990), "El club de los inocentes" (1994, premiu "Xosefa de Xovellanos" de novela), "El suañu de los páxaros de sable" (cola que repitió'l premiu "Xosefa Xovellanos" de novela nel 1999) y "Los homes de bronce" (2001) amás de los llibros de cuentos "Del llaberintu al trenta" (1995) y "Les cuentes de l'alma" (2000). La so obra más de recién inclúi nel añu 2005 amás de la novela "Les ruines" el volume "El nuesu mar de los sargazos".