Xabiero Cayarga recibe’l premiu de la Tertulia Malory al meyor llibru n’asturianu del 2011

Esti vienres, a les 17 hores, l’escritor Xabiero Cayarga (Cangues d’Onís, 1967) va recibir el premiu de la Tertulia Malory al meyor llibru n’asturianu del 2011. La obra que-y dio esta primera edición del gallardón foi ‘La ñeve del cuquiellu’.
 
El pub Tom Malory de L’Entregu, onde la Tertulia Malory vien aconceyando dende hai 14 años, va acoyer l’actu d’entrega d’esti premiu de creación nueva que busca prestixar les lletres asturianes escoyendo’l meyor llibru espublizáu en llingua asturiana nel añu. Nesta ocasión, el xuráu tuvo conformáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que se decidieron pol poemariu ‘La ñeve del cuquiellu’ de Cayarga, obra que tamién fora Premiu Teodoro Cuesta na convocatoria del 2010. El cangués va recibir un troféu, una ilustración d’Alfonso Zapico y una medaya d’oru conmemorativa. Amás, la Tertulia Malory va mercar 20 exemplares del llibru pa utilizar como regalu protocolariu nos actos qu’organice o nes que sía convidada.
 
Cayarga ye ún de los autores más destacaos en llingua asturiana. Diose a conocer nel añu 1994 cola novela ‘El boleru de Xabel’, obra que se llevó’l Premiu de Narraciones de l’Academia de la Llingua Asturiana. Tamién escribe cuentos y poesía, llevándose dellos gallardones lliterarios nesti xéneru últimu. Sobre ‘La ñeve del cuquiellu’, la Tertulia Malory señala que “la residencia, dende hai años, del autor n'Alemaña dexa un posu apalpable nel llibru, un tonu seriu, llimpiu y claru non faltu d'ironía y hasta humor, como cuando fai referencia a les ilusiones de la mocedá sobre la construcción d'una identidá nacional p'Asturies”.