Xabel Vegas prepara un discu en solitariu

El batería de "Manta Ray" Xabel Vegas ta preparando
discu, Asturies.com faló con él d'esti proyectu musical mui
personal.



El batería Xabel Vegas paez que quier siguir el camín del
so hermanu, Nacho Vegas, y entamar un proyectu propiu y personal. Ello ye que'l
músicu asturianu ta preparando, xunto con otros músicos, los
temes que tienen que ser nel futuru el so primer discu en solitariu. Xabel
Vegas yá fizo una pequeña incursión nesti xeneru
participando col cantar "Palabres" nel discu de la Xunta Moza
"L'asturianu
VIVE, la llucha SIGUE""La música va ser toa compuesta
por mi, y quiero dar más importancia a los testos, pa ello toi
trabayando con lletres míes y de collaboradores, pa tener una bona
riestra d'elles pa escoyer cantar y idioma, yá que va haber cantares
n'asturianu y castellanu". En cuesta a la difícil pero posible
definición musical Vegas comenta que "Espero sacar un
soníu de música d'autor, pero con toques de rock yá que
voi dir acompañáu por una banda". En cuantes a cuando
podremos sentir daqué d'estos nuevos cantares, "tamos trabayando
muncho nos ensayos, doi más importancia a sacar un bon directu qu'a
poneme a grabar, ello ye que primero de dir pal estudiu quiero facer unos
conciertos pa ver como furrula, anque con too y con ello yá toi falando
con delles discográfiques". D'otra manera esti proyectu de
Xabel nun quier dicir que "Manta
Ray" quede pa prau, y la banda ya ta pensando en sacar un nuevu
discu.



Per otru llau la familia nun para, y el so hermanu
Nacho Vegas yá
ta grabando nel Puerto de Santa María, xunta a la so banda "Las
Esferas Invisibles", los cantares del so tercer discu, que va ser
editáu a primeros del añu qu'entra. Pa finales d'ésti va
editar un epé que probablemente va llevar tres cantares que nun van dir

nel álbum.