Worldcom, otru escándalu financieru

Depués de la quiebra a últimos del añu pasáu de la eléctrica Enron, una riestra de grandes empreses americanes, que se suponíen segures y rentables, acabaron tamién protagonizando escándalos de cuentes entrampiaes que resultaron más graves por llevar la firma de consultoríes de prestixu que se suponía que daben l'absolución contra tolos trafullos contables. Tres el récord d'Enron, que supunxo la quiebra más grande d'una empresa americana, esta selmana, la casa de telecomunicaciones Worldcom dixo tamién qu'entraba en quiebra, baltiando la marca de la eléctrica texana al anunciar una perda de cerca de cuatro billones de dólares. Arriendes de que yá ye normal a estes altures que grandes empreses fundan d'un día pa otru víctimes de la so propia estratexa d'especulación y corrupción internes, lo más grave ye que, hasta depués de muertes, estes cases siguen funcionando y moviendo un volume de negociu bien curiosu. Por poner el casu más estremu, Enron entovía funciona y pa encima cuenta con seguir de líder mundial de la enerxía. Anque el Congresu de los EEUU aprobó delles midides contra estos abusos empresariales, Robert Weissman, autor del llibru "Corporate Predators" opina que les práctiques d'Enron, Worldcom, Xerox y demás son parte d'una nueva manera de facer negocios y que amás los gobiernos tan tres d'ello sofitándolo gracies a la mengua de los impuestos