Willy deVille convenció na primer nueche del Crossroad

La primer xornada del Cross Road Festival arrancó con una actuación ensin pega nenguna de Willy deVille pero con una sensación de vaciu nos praos de la Universidá llaboral, un recintu preparáu pa más de 15.000 persones y al qu'ayeri namás asistieron unes 2.000 que contemplaron, eso si, una actuación de calidá.

Dempués de que les versiones d'Elvis de King Wolf prepararen l'ambiente, l'inclasificable artista neoyorquin, que salió al escenariu con un retrasu d'una hora por problemes técnicos, presentó los temes del so últimu discu y fexo un repasu de la so carrera, incluyendo tamién delles versiones d'otros músicos, casu de Muddy Waters, nun conciertu de gran calidá qu'enganchó progresivamente al públicu. Willy de Ville, col so estolaxe inconfundible, tuvo los clásicos toques del artista que se conoz divu pero ensin perder en nengún momentu'l contactu y la complicidá col públicu, con frases d'agradecimientu y comentarios con gracia, como cuando anunció que diba tocar temes del so discu más de recién cola entrada "esto igual nun lo conoceis, pero…". De cualquier manera, el show de deVille nun se tien solo na so persona magnética, y l'artista sabe arrodiase d'una banda competente con coros femeninos y instrumentistes de calidá con un slide y guitarristes que protagonizaron momentos intensos de rock.

Mala suerte tuvieron los asturianos que pesllaben la primer nueche del festival, Robbie and The Wild Trains. La formación qu'axuntaba a clásicos de la escena asturiana, viose afectada polos retrasos nel horariu y por una estraña cigua coles cuerdes de les guitarres, que rompíen una tres d'otra ensin esplicación aparente na guitarra de Roberto Egocheaga, qu'optó por dexar les seyes cuerdes y centrase no vocal. Ello nun quitó pa que l'espectáculu de Roberto, Rafa Kas, Juan Toraño y Rafa "Cohete" tuviere a un altu nivel musical.

La primer xornada del CrossRoad, a la espera de que col fin de selmana aporte'l gran públicu al festival, dio tamién pa ver como ye la xente del Crossroad, un festival que mueve a un públicu de mediana edá y gran cultura musical que tien yá nel CrossRoad una de les referencies del so calandariu particular, siendo facil ver xente de toles procedencies ayeri pelos praos de la Llaboral. La organización, ensin pega nenguna.

El festival sigue esta tarde dende les 20:30 coles actuaciones de Lucky Peterson, los Stepbrothers (única banda que repite del 2004) Blues Explosion y Presidents of the USA ente otros, mientres que la presencia de Little Richard, que llegaba güei al aeropuertu de Ranón, ye lo más destacao del cartel del sábadu. El calter de mitu qu'acompaña a esti padre indiscutible del xéneru, que con 69 años va dar en Xixón la que va ser seguramente una de les sos últimes actuaciones enantes de retirase.