Wikipedia n’asturianu participa nuna campaña d’edición sobre los díes internacionales de Naciones Xuníes

|
Wikipedies ibériques

Delles wikipedies ibériques, ente elles l’asturiana, entamen dende’l sábadu y hasta’l día 25 una ‘Editatón Díes Internacionales’ multillingüe. L’oxetivu ye ameyorar la información sobre estes xornaes promovíes por Naciones Xuníes centraes en diferentes causes qu’ofrecen la versión de Wikipedia n’asturianu, español, portugués, catalán, eusquera y gallegu.

El Día Internacional de la Llingua Materna, El Día Internacional de la Muyer, el Día Mundial del Braille, el Día Internacional de la Educación, el Día Mundial de l’Agua o’l Día Mundial de Concienciación sobre l’Autismu son dalgunos de los 185 díes internaciones oficiales que Naciones Xuníes dedica a conmemorar acontecimientos y xenerar conciencia sobre temes d’importancia global. Cola fin de da-y una mayor visibilidá y importancia na enciclopedia llibre y reducir la brecha d’estos conteníos, estes wikipedies en llingües ibériques proponen un retu d’edición en llinia multillingüe.

Baxo’l nome de ‘Editatón Díes Internacionales’, Wikipedia n’asturianu, Wikimedia España, Wikimedia Portugal, Amical Wikimedia, Euskal Wikilarien Kultura Elkartea y Galipedia arranquen el sábadu esta actividá p’ameyorar artículos sobre estos díes internacionales y crealos nel casu de que nun tengan. Asina, prepararon un llistáu con 180 entraes coles que trabayar nesta campaña d’edición que se va allargar hasta’l 25 d’esti mes y a la qu’animen a participar a axentes diversos de la sociedá civil, el sector educativu, gobiernos llocales y internacionales, y otres entidaes, aportando y aumentando la información sobre estes xornaes de sensibilización.

Contador Estadistiques