Vuelve la revista “Liño”

La revista d'Historia del Arte "Liño" presenta un nuevu númberu tres de 14 años en que nun s'espublizó.

Presentada nel 1981, Liño foi'l voceru al traviés del que yera posible conocer les investigaciones más de recién nel campu de la Historia del Arte n'Asturies, siendo los sos artículos una interesante fonte documental. A lo llargo de diez años la revista tuvo una periodicidá añal, pero tres del númberu de 1991 llegó un silenciu que duró hasta esti 2005, en que ta acabante de presentase un nuevu númberu baxo la dirección de Soledad Álvarez, profesora de la facultá d'Historia y que reparte les sos especialidaes ente l'Arte Medieval y la escultura contemporáneo.

La ilesia prerrománica de San Miguel de Lliñu ye ún de los oxetos d'estudiu d'esti númberu, con un artículu obra del profesor Lorenzo Arias Páramo. Otramiente, la profesora Yayoi Kawamura fai un estudiu sobre'l proyectu de Melchor de Velasco pal monesteriu de San Pelayo y Vidal de la Madrid pon otru sobre'l palaciu de Miranda Valdecarzana en Grau y la capilla de Nuestra Señora de los Dolores nesti mesmu conceyu, mientres que l'especialista n'arquitectura y artes populares Gerardo Díaz Quirós fala d'arcones con decoración llabrao en conceyu Quirós.