Vuelve la polémica pol refuxu del Meicín

El Colectivu Montañeru Pola Defensa de los Picos d'Europa denuncia que la Conseyería de Cultura va presentar n'ochobre un nuevu proyectu d'edificación pal albergue de Pinubina cola mesma superficie útil que'l que refugó la CUOTA'l mes de marzu

Dempués de que la Comisión d'Urbanismu y Ordenación del Territoriu d'Asturies (CUOTA) echare p'atrás el proyectu de refuxu na Vega de Meicín en Pinubina (L.lena) por pasar de l'altura máxima permitida, la Conseyería yá diere anuncia de que diba remocicar el proyectu pa que cumpliere coles normes urbanístiques. El Colectivu Montañeru Pola Defensa de los Picos d'Europa adelantó ayeri los términos d'esa reforma cola que la Dirección de Deportes y la Conseyería de Cultura Comunicación Social y Turismu intenten, por quinta vez, la construcción del polémicu edificiu.

El grupu montañeru que dirixe Avelino Cárcaba diz qu'esta vegada, pa poder cumplir cola llei, la Conseyería quier facer un edificiu de menos altura pero con más metros de planta, colo que'l resultáu final va ser el d'un edificiu col mesmu volume y, polo tanto, igual d'agresivu cola rodiada. El Colectivu Montañeru recuerda que'l proyectu del refuxu del Meicín yá se va retirando en cuatro ocasiones dende l'añu 2.002, les cuatro siempres por problemes mediuambientales, y llamenta que l'organismu que dirixe Daniel Gutiérrez Granda nun contemple la solución alternativa que proponen los grupos ecoloxistes, que consiste en facer el refuxu en pueblu de Tuiza Riba, un llugar yá urbanizáu y que ta a namás 1.500 metros de la Vega del Meicín.

Más de mil alegaciones foron les que se presentaron contra l'últimu proyectu, que la CUOTA desautorizó por incumplir les normes urbanístiques del conceyu de L.lena cuando la Conseyería yá tenia alxudicaes les obres.