Vuelve Escenines con teatru y música n'asturianu nes vacaciones escolares

Reciella fixo públicu güei el cartel del Festival de teatru y artes escéniques n'asturianu pa neñes y neños que se fai en Xixón algamando la so tercer edición

Dende l'asociación de families pol asturianu preténdese "celebrar esta tercer edición con un programa bien completu, teniendo la suerte de cuntar con dalgunes de les meyores compañíes de teatru profesional asturianes y abriendo'l festival con un discu que toles families van querer tener".

Nos próximos díes Reciella dirá dando detalles de los espectáculos, que van entamar el 27 d'avientu con un conciertu nel que van participar una dellos grupos cantando temes infantiles n'asturianu y acabar el 4 de xineru.

Les compañíes teatrales que van participar nesta edición  son Higiénico Papel Teatro, "Carlos Alba Cellero" y El Callejón del Gato y toles actividaes van facese nel Colexu Xovellanos de Xixón, que collabora na organización xunto cola Conceyalía de Cultura del Conceyu de Xixón.