Voz nel folk de cámara

Esti vienres volvemos de tener la oportunidá de ver un bon conciertu de folk en Xixón, conciertu na que voz va ser l'instrumentu principal.

El tríu del conciertu de Folk de Cámara ta formáu esta vegada por Xosé A. Fernández "Ambás" na voz, "Ambás" ye conocíu pol so trabayu col grupu "N'Arba" dende 1997, asina como con delles agrupaciones y colectivos d'investigación etnográfica. Trabayador de campu incombustible, ta trabayando na compilación d'un archivu de cantares tradicionales que vien rexistrando per tola xeografía asturiana; el repertoriu d'esti conciertu ta montáu dafechu a partir del so material.

Na xiblata vamos tener a Pepín S. Menéndez "Pepín de Muñalén" músicu de Tinéu que llegó al centru d'Asturies p'ablucar a propios y estraños, pola so técnica, con un raigañu fonderu nel estilu de xiblata tradicional de la so área, bayura de repertoriu y un gusto hiperdesarrolláu pa la interpretación. Pepín toca la xiblata nel grupu de folk asturianu "Bron" y na "Bandina'l Tombo".

Pa la cuerda tenemos al conocíu bouzoukista del folk asturianu Elías García. Miembru fundador de los yá míticos "Llan de Cubel", amás de ser ún de los primeros en tocar un bouzouki n'Asturies. Collabora otramiente con tou tipu de colectivos rellacionaos cola música tradicional y el folk asturianos.

El repertoriu del conciertu, como yá diximos, ta formáu por 18 temes del archivu personal Xosé Antón Fernández Ambás, amás de dalguna pieza más instrumental. Los cantares tan organizaos de forma que vamos a facer un recorríu per Asturies d'occidente a oriente gracies a la música. D'esta manera vamos empezar n'Ayande, pasar per Valdés, Gozón, Grao hasta Llanes, Peñamellera o Cabrales. Un enfoque personal de la tradicional vocal asturiana d'estos tres músicos, que ye abondo atractivu pa nun faltar a la cita esti vienres día 28 de payares a les 19:30 na Casa Natal de Xovellanos de Xixón nel barriu de Cimavilla.