Von der Leyen, primer muyer en presidir la Comisión Europea

La conservadora alemana Ursula von der Leyen pasa a la historia al convertise na primer muyer en presidir la Comisión Europea dende la so creación nel añu 1958. Ye la decimocuarta persona n’ocupar el más altu cargu executivu de la Xunión Europea (XE).

El Parllamentu Européu confirmó ayeri nuna axustada votación secreta, con 383 apoyos, a Von der Leyen como presidenta de la Comisión Europea, puestu del que va tomar posesión el 1 de payares. Namáí superó la cifra necesaria por 9 sofitos –mayoría absoluta de la Cámara, esto ye, 374–, recibiendo 327 papeletes en contra y 22 astenciones

L’alemana contó col apoyu del Partíu Popular Européu, de los lliberales y de parte de los socialdemócrates. Nun lo tendría de la ultraderecha –a esceición de los polacos–, por mor del so discursu a favor de la xunión d’Europa, y presuntamente de los ecoloxistes, anque valoraron l’avance de Von der Leyen en materia mediambiental con respeuto a los sos predecesores y la so defensa del feminismu.

Nacida en Bruxeles precisamente nel añu nel que tamién alemán y compañeru de partíu Walter Hallstein presidía la recién creada Comisión Europea tres l’aprobación l’añu anterior de los Trataos de Roma que daben orixe a la Comunidá Económica Europea, fía d’un funcionariu alemán del organismu, mudó a Alemaña mientres l’adolescencia, onde desendolcó la so carrera política. Afiliada al Christlich Demokratische Union Deutschlands (CDU), que forma parte del Partíu Popular Européu, ocupó los cargos de ministra d’Asuntos Familiares, Mayores, Muyeres y Mocedá, de Trabayu y Asuntos Sociales, y de Defensa, ésti últimu del 2013 hasta agora.

Pasos próximos

La socesora del luxemburgués Jean-Claude Juncker ha de dirixise agora per carta a los xefes d’Estáu o de Gobiernu pa pidi-yos que propongan candidatos pa formar parte de la Comisión. Les audiencias de los comisarios designaos énte les comisiones parllamentaries correspondientes tán previstes del 30 de septiembre al 8 de ochobre.

El colexu de comisarios ha de recibir el preste del Parllamentu nuna votación prevista mientres la sesión plenaria del 21 al 24 d’ochobre. La votación será nominal y, pa ser confirmáu, el colexu tendrá que recibir una mayoría de votos emitíos.

Semeya baxo llicencia CC-BY-4.0: © European Union 2019 – Source: EP