Volume IV pal Nuevu Folk asturianu

Esta selmana L'Aguañaz sacó a la cai'l cuartu volume de la serie "Nuevu folk asturianu", nel que se presenten cinco grupos nuevos dafechu a la xente aficionao al folk.El discu entama coles composiciones del grupu "Niundes", formáu por alumnos de la escuela de música tradicional Llacín de Llanes. Son seis miembros, ente la guitarra, el bouzouki, la gaita, el vigulín, el bodhran y la voz, que con soníu acústicu domináu mayormente pola cuerda del bouzouki y la guitarra, la gaita y la voz de Belén Díaz, recuérdanos en munchos momentos a "Corquiéu". Darréu d'ellos, y nuna llinia musical apaecía, ta "Bron", un grupu nel que podemos topar dellos nomes conocíos nel folk asturianu como son Daniel Lombas (percusión) o José Sevando Menéndez "Pepín de Muñalén" (xiblates), que demuestren xunta Dolfu Fernández (vigulín) y Alberto Alblanedo (guitarra y bouzouki), perbona técnica interpretativa y un gustu pol
folk clásicu y acústicu.
Hacia la metá del discu alcontraremos a "Gueta na Fonte", que representen un estilu estremáu de los demás grupos de la esbilla. Un folk más aposentáu, nel que se conoz la formación en música clásica de dalgunos de los sos miembros, y que nes pieces cantaes da un resultáu sonoru que nun tamos mui fechos a sentir dientro'l folk asturianu. Con "Triba" volvemos al soníu que domina la mayoría del discu, tres rapazos d'Avilés que cola uilleann pipe, la gaita, les guitarres y el vigulín demuestren l'afición que-y tienen al folk irlandés y escocés, usando dacuando composiciones y pieces tradicionales bretones y asturianes.Yá p'acabar ta'l grupu que más-y prestó al qu'escribe estes llínies, "Ú?", sobremanera lo dos cantares que piesllen el discu, "Xotes" interpretaes con muncho gustu, y "Segadora", tonada tradicional cantada pol xiblateru Pedro Díaz acompañáu pol restu'l grupu. Los demás músicos de la banda son xente tan conocío nel ambiente musical como Rubén Bada col vigulín, Antón Barquero coles percusiones, Rubén Álvarez na guitarra y Horacio A. García col contrabaxu.El discu son en total quince cantares, tres pa cada grupu, que sirven pa char una güeyada rápida a lo que ta faciendose n'Asturies. Si vos peta podéis mercar yá'l discu na nuestra tienda na rede.