“Voi defender los principios de l’Academia, porque creo nellos”, afirma Claudia Menéndez

“Trabayu, trabayu y más trabayu” ye lo que promete aportar la filóloga Claudia Elena Menéndez Fernández, nomada académica de númberu de l’Academia de la Llingua Asturiana (ALLA). Con 29 años, conviértese na más moza de la institución.

“Con plasmu” recibió’l llunes la llamada de Xosé Antón González Riaño pa comunica-y que fora escoyida pol plenariu como académica de númberu. Nacida en La Güeria Carrocera nel 1994, Menéndez ye profesora de Llingüística Románica na Universidá d’Uviéu y Doctora en Filoloxía Románica, con una actividá investigadora que, ente otres especialidaes, va de la onomástica a la sociollingüística, y que-y valió pa tener delles estancies n’universidaes europees y una importante collecha de publicaciones, participaciones en proyeutos y conferencies.

Una carrera qu’arrancó nel campus d’El Milán y que tuvo dende siempre venceyada a la institución. “Dende qu’entamé los estudios de Filoloxía col mínor d’asturianu principié a trabayar cola Academia, a facer cosuques con ellos con munchu respetu”, esplica.

“De mano apuntéme a los cursos como alumna, depués yá m’ofrecieron participar como profesora y en dalguna comisión de trabayu que tien l’Academia, como de trabayu col diccionariu o pedagóxiques, nes que me conviden a tar y aportar el mio puntu de vista”, añade Menéndez, que confiesa que “obviamente esto nun lo esperaba porque nunca pienses qu’una cosa asina te pueda pasar a ti, que’l llabor que tu faes pueda dar llugar a un reconocimientu d’esti tipu. Nun dexo de tener 29 años y hai muncha xente que ta trabayando, que trabaya pol asturianu, y que tien una carrera más consolidada que la mía. Ye una cosa p’agradecer”.

Conviértese esta filóloga na más moza de la institución y una de les académiques de menos edá de la so historia, yá que dende los 80 nun entraba naide menor de 30 años. Namás al entamu, con persones como Carlos Rubiera o Ramón d’Andrés, atopamos exemplos d’académicos más xóvenes.

Premiada nos concursos d’investigación

Dende l’ALLA rescamplen tamien de Menéndez “la so implicación en dos comisiones de trabayu (pedagóxica y lexicográfica), na Universidá Asturiana de Branu (como docente y direutora) y tamién nel ámbitu editorial, como autora de dellos artículos y del llibru ‘Averamientu al asturianu de La Güeria Carrocera’, trabayu que consiguiere’l primer premiu y el premiu especial nos concursos d’investigación de l’Academia nel añu 2022”. Pendiente d’una conversación con González Riaño pa conocer lo que la institución requier d’ella, l’académica nueva asegura que “lo que puedo aportar ye trabayu, trabayu y más trabayu. Pa lo que necesite l’Academia ehí taré, pa defender los sos principios, porque tamién yo creo nellos”.