Visita a Asturies de la ministra de Mediu Ambiente

La ministra de Mediu Ambiente Cristina Narbona visitó ayeri Avilés y Xixón, onde participó na presentación del parque fluvial del Piles,que tien p'alxudicar la so segunda fase por un importe de 12 millones d'euros y na inauguración de la depuradora d'Aboño, mientres que polo que-y toca a Avilés comprometióse a terminar el plan de saneamientu integral de la ría pal 2008 cola alxudicación inminente del emisariu de Xagó y el colector industrial de la oriella derecha de la ría.

Colectivos ecoloxistes aprovecharon la visita a Asturies de la ministra pa facé-y llegar una carta de protesta na que-y resumen les obres que'l Gobiernu asturianu ta llevando alantre y que, al entender de la Coordinadora Ecoloxista, son dañines pal mediu ambiente. La construcción de la estación d'esquí "Fuentes de Invierno" en Puirtu Braña (Ayer) abre una llista de denuncies na que la coordinadora acusa al Principáu de querer urbanizar los Picos d'Europa per aciu de la variante de y de querer construyir por quinta ocasión el refuxu del Meicín en Pinubina (L.lena) que los ecoloxustes califiquen de "hotel". La xestión del agua merez tamién la condena conservacionista, col enfotu del Gobiernu en facer l'embalse de Caliao y la campaña de canalización de ríos que ta faciendo d'ellos "calces de cementu"

La construccción de campos de golf y urbanizaciones de xalés na costa, la permisividá cola minería a cielu abierto, les consecuencies de la obra d'El Musel, l'apueste poles especies alóctones que fai el plan forestal y la estratexa al favor de la gran producción eléctrica son tamién otres quexes que vienen na carta del colectivu ecoloxista.

Ello ye que la carta a la ministra Narbona llega una selmana dempués de que la titular de Mediu Ambiente tuviere en cuenta les alegaciones d'otru grupu ecoloxista, Ecoloxistes n'Acción, sobre'l proyectu pa la construcción de la macroestación d'esquí de San Glorio, en Palencia, que diba tener un gran impactu sobre'l mediu ambiente. La decisión de la ministra, qu'unvió una carta oponiéndose a la estación d'esquí, amás de ser inédita hasta agora, ta teniendo gran repercusión al otru llau del cordal, anque la prensa castellana carga sobre'l fechu de que, siendo l'alministración central de color distintu que l'autonómica, ello influyó na decisión ministerial, anque tamién el PSOE de Castiella-Lleón se posiciona al favor del proyectu.