Villaviciosa vive esti fin de selmana la fiesta de la gaita

La XVII Liga Galega de bandes de gaita llega al conceyu de Maliayo con una montonera de propuestes musicales, toes elles rellacionaos cola gaita. Conciertos de perconocíos solistes de gaita y de grupos folk, arriendes de les pruebes de la propia lliga, que va aconceyar a 2.400 gaiteros y percusionistes de 80 bandes de gaites, son una ocasión hestoríca n'Asturies pa ver que significa esti intrumentu dientro y fuera d'Asturies.

Nel motivu de que'l conceyu de Villaviciosa acueya esti fin de selmana una preba de la Liga Galega de Bandes de Gaita tien muncho de culpa la perbona actuación de la banda del conceyu nesta competición. La Banda de Gaites de Villaviciosa foi campeona d'esta lliga nos años 2005 y 2006, y na edición d'anguaño va na segunda posición, colo que, col sofitu de la xente de casa, la banda tien enfotu en facer una bona actución esti domingu a les 12:30 hores, hora na que va actuar nel concursu la Banda de Gaites de Villaviciosa. Les prebes de la Liga van desenvolvese'l domingu pela mañana a partir de les 11:30 nel aparcamientu d'El Pelambre.

Amás de les prebes de la Liga, les nueches del vienres y del sábadu van contar con varios invitaos musicales, toos ellos rellacionaos cola gaita d'alguna manera. Per una parte el vienres, nel mesmu parking d'El Pelambre va haber una nueche folk cola actuación de la bandina La Curuxa, el grupu folk Los Gatos del Fornu y pa pesllar la nueche el ska-rock de Skama la Rede, banda que ta rematando'l so segundu discu, que vien col nome de "Echaos a la mar".

El sábadu los aficionaos a la gaita van tener una oportunidá única, la de ver xuntos nun mesmu escenariu a varios de los meyores gaiteros del mundu, caún cola so gaita. El cartel ye un mecíu de gaites del arcu atlánticu dende'l norte hasta'l sur, colo que se va poder disfrutar de diferentes estilos y soníos. Entamando polo más al norte, va actuar el gaiteru Jarlath Henderson d'Irlanda, gaiteru que collaboró nel discu "Namái" de DRD y que recibió'l premiu de músicu del añu de la BBC de 2003 cola gaita irlandesa. De la vera de la islla d'islla d'esmeralda vien Fred Morrison, gaiteru escocés que tien visitao Asturies bien de vegaes, amás de ser collaborar nel discu del grupu "Deau Dubra". Dende Bretaña va venir a tocar tamién un conocíu de vieyo de los aficionaos al folk n'Asturies, el gaiteru Patrick Molard. Y ya de la peninsula Ibérica va tar presenta la gaita gallega con Anxo Lorenzo, gaiteru collaborador de varies formaciones y qu'algamó dello de fama cola formación "Spiritu 986". La participación asturiana nesta xuntaza de gaiteros va concretase na presencia de José Manuel Tejedor, ganador en trés ocasiones del prestixosu Macallan, arriende de formar xunta los sos hermanos Javier y Eva Tejedor el grupu "Tejedor". Asimesmo los músicos Rubén Bada, Horacio Martínez y Javier Tejedor van iguar una bandina que va acompañar a los gaiteros. Les actuaciones, que van entamar a eso de les 21:30 hores nel aparcamientu d'El Pelambre, van finar col conciertu del grupu asturianu "Corquiéu", remantando un fin de selmana en que Villaviciosa va convertise na capital internacional de la gaita.