Villaviciosa va acoyer esti vienres una xornada dedicada a la sidra

La Fundación José Cardín Fernández dedica esti vienres una xornada a la sidra. ‘Agora sidra’ va ufrir una conferencia de Javier Artiach Basterra entitulada ‘Una perspectiva de la sidra; mirando al futuro’.
 
Aurelio Martín, conseyeru de Mediu Rural y Pesca va encargase d’inaugurar estos ‘alcuentros nel mundu de la sidra’ entamaos pola Fundación José Cardín a les 11 hores na sede de la entidá maliaya, pa depués dar pasu a la conferencia del direutor de CANADEAN Ltd pa Iberia y Llatinoamérica. Les persones presentes van poder participar tres esta intervención nuna tertulia cola persona convidada pola Fundación.
 
‘Ágora Sidra’ va completase con una preba de sidra xunto col periodista y críticu enólogu Carlos Delgado, actividá na que namái van poder participar aquelles persones que s’inscribieren de forma previa.