Villarrobledo y Sestao River, rivales últimos pal Lealtad y el Marino nel so camín a Segunda B

El sortéu afita que los gozoniegos disputen la vuelta n'Euskadi, mentes que'l primer puestu permite a los maliayos xugar el partíu decisivu de la eliminatoria en Les Caleyes.

El Lealtad, tres remontar nun gran partíu el 1-0 que se traxo de Formentera gracies a los goles de René Montoto (minutu 4), Robert Martínez (31) y Pelayo Pedrayes (57), recuperó la sienda de la victoria depués de la eliminación col Getafe B y el revés de la ida. Los de Samuel van buscar agora l'ascensu a Segunda División B col CP Villarrobledo tres el resultáu del sortéu celebráu ayeri en Las Rozas.

Con dos ascensos al llombu na década de los 80, a los qu'arrenunció, el conxuntu manchegu terminó en tercera posición del grupu 18 y eliminó al Olímpic (4-1) y a la Gimnástica Segoviana (3-1) ensin conocer la derrota nos cuatro choques de les eliminatories. El sábadu, a les 20 hores, el Municipal de La Virgen, de prau natural, va acoyer el partíu d'ida.

2-0 en Miramar

El Lealtad tamién despachó un bon partíu cola Mutilvera, al que superó por 2-0 depués del 0-0 de la ida gracies a un tantu tempraneru d'Álex Arias (minutu 4) tres un penalti a Luis Morán, que sentenció nel 86. Los d'Oli van xugar pol ascensu agora con otru segundu, el Sestao River, col primer partíu en Miramar el domingu a les 18 hores.

L'equipu vascu, que busca'l so retornu a Segunda B tres dos campañes en Tercera, dexó nel camín al Toledo (3-2) y al Poblense (4-2).

Na imaxe, eliminatories definites pa decidir los 9 equipos restantes que van xubir a Segunda División B.