Vil.lar de Vildas, pueblu exemplar d'Asturies 2004

El galardón qu'entrega la Fundación Príncipe d'Asturies y que ta dotáu con venticinco mil euros va esti añu pa Vil.lar de Vildas, el pueblu somedán que s'asitia na entrada a la Braña de la Pornacal. Vil.lar de Vildas dexó atrás más de venti candidatos, ente ellos Sariegu, que quedó finalista. Una gran pancarta n'asturianu celebraba esta mañana nel pequeñu conceyu del centru-oriente d'Asturies el llegar hasta la final al mesmu tiempu qu'anunciaba la intención de presentase otra vuelta nel 2005

El Premiu al Pueblu Exemplar d'Asturies empobínase al "pueblu, aldea, núcleu de población o grupu humanu que destacare na defensa y conservación del so arrodiu natural o ecolóxicu, patrimoniu histórico, cultural o artísticu, na realización d'obres comunales o otres manifestaciones de solidaridá estraordinaria".

Nel casu de Villar de Vildas el xuráu destacó como lo qu'a primeros de los 90 yera un pueblu mal comunicáu con economía basada n'agricultura y la ganadería supo tresformase cola llegada del turismu masivu a Somiedu ensin perder el so raigón, como pue vese nel mantenimientu de la población y nel fechu de qu'esti pueblu del Pigüeña seya ún de los que meyor caltuvieron la vaca d'Asturiana de los Valles cuando Asturies importaba vaques d'otres races. La bona conservación de les 65 cabanes de teitu del pueblu, llabor que faen artesanalmente los mesmos vecinos y la bona conservación de tolos elementos y espacios comunales del pueblu ficieron a esti pueblu merecedor del pueblu al paecer del xuráu.

Dende qu'entamó a dase en 1.990, esti premiu benefició a San Esteban de Cuñaba, na Peñamellera Baxa, l'Asociación de Amigos del Paisaxe de Villaviciosa "Cubera" nel 1991, Soutu Lluiña y Nuviana nel 1992; la comunidá vecinal de Grandas de Salime nel 1993, los Pastores de los Picos d'Europa nel 1994, A Veiga, en Navia nel 1995, la Comunidá Vecinal de Nava nel 1996, la Comunidá Vecinal de Castropol nel 1997; la parroquia de Xomezana y el Val.le Güerna nel 1998, la Comunidá Educativa y Vecinal d'Ibias nel 1999; Tuña (Tinéu) nel 2000, Paredes (Valdés) nel 2001, la Hermandá de la Probe y la Foz de Morcín nel 2002 y Navelgas, Tinéu (2003).