Vigón diz que la movilización sindical "va contra la soberanía popular"

El presidente de la Federación Asturiana d'Empresarios (FADE) y vicepresidente de la Confederación Española d'Organizaciones Empresariales (CEOE), Severino García Vigón, criticó qu’UXT y CCOO anunciaren manifestaciones.

A xuiciu del dirixente empresarial, eses movilizaciones, incluyida la fuelga del 29 de setiembre, "van contra la soberanía popular", porque s'oponen a la llei aprobada pol Parlamentu, la relativa a la reforma llaboral.
 
"Lo que precisa a España nun son movilizaciones, sinón centrar esfuerzos na salida de la crisis", dixo Vigón, a preguntes de los periodistes, antes de participar nunes xornaes de finances pa pymes entamaes pola Cámara de Comerciu d'Uviéu col patrociniu de Caxastur.
  
Vigón recordó a los sindicatos que la llei de la reforma llaboral aprobóse'l 1 de setiembre y que nun aprovecharon el trámite parlamentariu pa facer presión. "Si les lleis nun valen, qué vamos dicir", acabó.
  
Per otru llau, y preguntáu pola consolidación d'empléu públicu qu'Asturies va poner en marcha, con unos 2.600 puestos, Vigón calcó en qu'esti nun ye'l momentu pa facelo.