Vidíu ta recuperao según la Conseyera

La conseyera de Mediu Rural y Pesca, Servanda García dixo ayeri nel plenu de la Xunta Xeneral del Principáu respondiendo a entrugues del grupu popular que'l caladeru de Vidíu, en conceyu Cuideiru, d'au se sacaron más de 500.000 metros cúbicos d'arena pa rellenar con ello la Playa de Salinas "ta rexeneráu y nunes condiciones que-y permiten agospiar más especies marines de les que tenía"

La Conseyera xustificó la so optimista valoración de la situación del caladeru nos datos que-y apurrió'l Centru d'Esperimentación y Obres Públiques del Ministeriu de Fomentu, que dixo que va facer a lo llargo de dos años diez campañes de siguimientu del caladeru de Vidíu, dando una pasada cada dos meses pel llugar pa comprobar la evolución del estáu fondu de la caladeru y de les captures de pesca nel llugar. Según los datos de la primer evaluación d'obres públiques esiste yá una "rexeneración con grosores d'ente 0,4 y 2 metros de sable sobre la piedra del fondu, que yá ta cubierta dafechu con arena fino gordo que permite agospiar más especies de les qu'había enantes de la obra.

La entruga del PP a la Conseyera falaba tamién sobre la previsión de que se saque'l sable d'otros 24 caladeros pa rellenar con ello los espigones d'El Musel, que ta entamando la obra d'ampliación,a lo que la conseyera retrucó que yá esistía una declaración d'usos portuarios de El Musel que databa del añu 1999 con gobiernu del PP, el mesmu Gobiernu qu'ente'l 2001 y 2002 fizo un informe d'impactu ambiental de l'ampliación portuaria y amestó que ta trabayándose en comuña nuna comisión coles cofradíes afectaes pa negociar posibles ayudes.