Vidíu, el cabu amenazáu

el Cabu Vidíu ún de los sos accidentes xeográficos más importantes y tamién ún de los espacios naturales meyor conservaos de toa Asturies. Aficionaos a la ornitoloxía de munchos llugares avérense hasta Vidíu a contemplar el pasu de báramos de páxaros de toles especies y abaxo de los cantiles, na mar, los barcos salen dende la villa pixueta y otros puertos de la redolada pa pescar la sardina y el calamar, que se dan mui bien nos caladeros d'enfrente de Vidíu. La estabilidá del paisaxe terrestre y del ecosistema acuáticu d'esti llugar peligren en casu de salir alantre dos proyectos distintos enforma agresivos pal mediu ambiente y que, por una estraña casualidá, tienen por oxetivu'l mesmu llugar.

Cerca de 500.000 metros cúbicos

Esa ye aproximadamente la cantidá d'arena que la Demarcación de Costes quier sacar d'enfrente de Vidíu pa rellenar con ello la playa de Salinas, una de les más visitaes d'Asturies y que va tiempu sufrió una perda d'arena que menguó la so superficie. La cosa vien de vieyo, y foi yá'l 26 d'ochobre del 2.000 cuando'l BOE espublizó una resolución pola que se pretendía torgar la perda d'arena de la Playa de Salinas y meyorar la entrada a la Ría d'Avilés. El proyectu proponía como arena a emplegar lo d'enfrente del Cabu Vidíu, onde se dicía qu'esistía "un "yacimientu" de 515.000 metros cúbicos d'arena que presentaba les característiques de diámetru y calidá afechisques pa la playa. La obra sedría tan fácil como poner unes bombes d'aspiración que, lliteralmente, surniaríen el sable hasta ponelo na playa, que ganaría col trasiegu una superficie ensin especificar de metros cuadraos. El proyectu de remocique de la playa, que s'estimó que nun precisaba d'informe d'estudiu d'impactu mediuambiental, escaeció apautar les consecuencies de la estracción masivo d'arena nun bancu de pesca, un detalle que col tiempu conocióse que yera más importante de lo que paecía.

La solución de treslladar grandes cantidaes d'arena yá se probare n'Asturies a primeros de los 90 pa la creación de la playa artificial del Nataoyo o "playa de Poniente" como se bautizó d'aquella, pero nun dexa de ser una solución agresiva pal mediu, más si'l llugar d'au cuenta sacase l'arena ye un caladeru de pesca, sobre'l que pue tener efectos dañibles enforma. La rocea coles partes interesaes nel aprovechamientu del caladeru yera inevitable, y asina la obra, prevista pa primeros del añu 2003, atopó la refuga de toles cofradíes de pescadores afectaes pola mesma y la del Conceyu de Cuideiru, parándose los llabores cuando taben yá pa entamar.

Anque la qu'entós yera alcaldesa de Castrillón, Ángela Vallina, fizo declaraciones públiques pidiendo que se sacare l'arena de Vidíu, y dellos colectivos vecinales de Salinas protestaron pidiendo que se ficiere'l tresvase, nadie más nun sofitaba'l proyectu n'Asturies, y hasta la Conseyera de Mediu Rural Servanda García, cola polémica yá maurecía, opinó contra la propuesta de Costes, de la que dixo en setiembre del 2003 que "La solución plantegada pola Dirección Xeneral de Costes d'utilizar arena procedente d'un bancu submarinu de la zona del cabu Vidíu nun ye l'afechisca, en cuantes que ye una zona de pesca de la sardina y del calamar, polo que dañaría enforma a los pescadores que trabayen nesta zona, y sobremanera a la flota de Cuideiru". La Conseyera declaraba entós que si yera precisu l'aporte d'arena, ello tendría de sacase d'otru llugar. El movimientu ecoloxista tampoco nun quedó a veles venir, y nel so informe añal "Destrucción a toda costa" nel que s'analiza la situación de tola costa española, la prestixosa organización Greenpeace nun-y mancaron prendes en calificar el proyectu de Vidíu como ún de los cuatro puntos negros qu'asitiaben na costa asturiana

La situación quedó allancada una bona temporada, pero tres del cambéu de gobiernu nel Estáu coles elecciones del 14 de marzu, en cuantes los nuevos responsables de Costes s'asitiaron nes sos nueves responsabilidaes, el proyectu de Cabu Vidíu esconsoñó y l'Estáu, al traviés de Costes, volvió col tema, pero aportando una novedá. Ello ye que yá se sabía de mano que pa bombiar l'arena de Vidíu hasta Salinas, una obra que se presupuestaba en cerca de 10 millones d'euros, l'Estáu ponía un 15% y l'otru 85% venía con cargu a los fondos de cohesión de la UE, pero nun taba en conocimientu del común de los mortales que les perres que ponía Europa vencíen y qu'en casu de nun facese la obra enantes del 31 d'avientu del 2004 tendríen de devolvese a Bruseles cerca de 9 millones d'euros. Énte esta situación, esti mes de setiembre, la Dirección de Costes, agora baxo la dirección de José Fernández, prendió l'alarma, y llamó a una xunta, que se celebró en Madrid, ente cofradíes y técnicos de la Dirección de Costes. Ellí dióse-yos a los pescadores copia del proyectu a executar.

Según un comunicáu oficial del Ministeriu de Mediu Ambiente, garantizábase "que se taba na seguranza de que la obra nun diba xenerar dañu nengún al sector pesqueru nin a los recursos naturales" pero na ringlera que venía darréu la mesma alministración reconocía que "sicasí, en casu de xenerar esta obra de suma importancia pal Conceyu de Castrillón y pal conxuntu d'Asturies dalgún tipu de perxuicios, esta alministración analizaría les reclamaciones que se presentaren pa compensar, nel so casu, los daños causaos". Por primer vegada, l'alministración reconocía implícitamente'l dañu que podía facer el sacar l'arena de Vidíu y ofrecía-yos una solución económica a los afectaos.

De cualquier manera, nel proyectu enxertábense definiciones y suposiciones que malamente podíen concasar cola realidá, como cuando diz, nel puntu 3 del Anexu 6, que fala de los efectos de la estracción y tresporte de l'arena, que "la operación de dragao prácticamente carez d'efectos sobre la fauna piscícola, en cuantes que la operación de draga espanta a los más de los pexes de la redolada" una frase que quier dar a entender que los pexes van fuxir del llugar en viendo qu'hai barullu y volver dempués. El proyectu presenta tamién la estracción de l'arena como una operación positiva, en cuantes que "la operacion de draga nel fondu va producir la disolucion de sales minerales procedentes del sedimentu, arriqueciendo la columna d'agua en sustancies nutrientes col consiguiente efectu positivu sobre'l fitoplacton y, al travies d'ello, l'efectu positivu va pasar a les redes trófiques".

Sicasí, tres d'aquella reunión, dellos representantes de los pescadores abrieron una puerte a la posibilidá de que se ficiere la obra, y a mediaos d'ochobre les máquines escavadores entamaron a desenterrar na playa de Salinas les cañeríes que llevaben preparaes dende l'añu 2003 pa conectales a les tuberíes.

La posibilidá d'un alcuerdu económicu colos pescadores paez una posibilidá pa despesllar la situación, pero la última reunión que se celebró esti miércoles 27 d'ochobre ente cofradíes y la Dirección Xeneral de Pesca d'Asturies, que ta mediando nel tema, dexó la situación otra vuelta allancada, declarando'l presidente de les cofradíes Dimas García que "nun tenemos garantíes de que nun vayan a desgraciar el caladeru" Entovía güei, nun se sabe por cuantu tiempu va aguantar el pulsu ente pescadores y costes nin pa que parte va cayer el resultáu del mesmu.

El proyectu pal remocique de la Playa de Salinas cola arena de Vidíu llegó tamién al conocimientu de los grupos ecoloxistes. Puestos en contactu con representantes de la Coordinadora Ecoloxista d'Asturies y de la Coordinadora Ornitolóxica que tuvieron accesu a la documentación completa, estos declararon a Asturies.com que-yos llamó muncho l'atención la poca relevancia que se-yos daba en proyectu a los efectos de la operación sobre'l caladeru, lo mesmo los inmediatos que los que se produciríen a llargu plazu sobre'l caladeru, y cuestionaron la oportunidá de l'actuación, en cuantes que, pa dellos especialistes, la playa que se pretende meyorar lleva de va unos meses pa contra acá recuperando arena ella sola per aciu de l'acción de la mar, colo que va tender a aposentar finalmente con una superficie asemeyada a la que tenía. Fontes consultaes especializaes n'impactu mediuambiental llamentaron que se vaya facer la obra y sorrayaron que, a estes altures, la perspectiva de devolución de los 9 millones a la UE pesa más qu'otres consideraciones, y la precipitación cola que se faiga la obra pue condenar a la desapaición una actividá tradicional de sieglos como ye la pesca.

18 furacos

Si una parte de los problemes del Cabu Vidíu "van baxo'l mar" como nel cantar, lo que ye talamente'l Cabu Vidíu tamién pue sufrir un cambéu radical d'equí a dientro de bien poco en casu de cuayar el proyectu d'una multinacional inmobiliaria americana pa facer ellí un campu de golf colos sos 18 furacos reglamentarios y con una urbanización de más de 100 xalés y 2 hoteles arreyada a la instalación deportiva. El campu y los demás edificios van sustituyir dafechu'l paisaxe de praos y viviendes tradicionales nuna superficie total de cerca de 100 hectárees del Cabu Vidíu

La promotora del campu de golf ye Landmark International, empresa con sede en Maryland (EE.UU.) y delegación pa España en Sevilla que declara na so web la intención que tien d'espardese pela Península Ibérica, considerándola como "el meyor mercáu de desarrollu d'Europa". Michael Long, ún de los directivos de la compañía, declara na web corporativa que "el valor de la compañía ye la preservación del mediu ambiente".

El movimientu ecoloxista, primeru en clamar contra'l posible campu de golf, tien una interpretación contraria dafechu a los directivos de Landmark y ve nel campu un ataque al mediu ambiente y tamién una tresgresión evidente de la llei. Asina, la coordinadora Ecoloxista d'Asturies acusó al Principáu de facer "papel moyao de la so propia llexislación" en casu de da-y el preste al proyectu. Los ecoloxistes afirmaben que'l Cabu Vidíu entra dafechu nel Paisaxe Protexíu de la Costa Occidental, según diz el Plan d'Ordenación de los Recursos Naturales del Principáu d'Asturies (PORNA), una figura de rangu estatal que ta penriba de cualquier disposición ambiental autonómica. Según l'estudiu que ficieron los conservacionistes namás sabese de les intenciones de Landmark, el mesmu PORNA fala del altu valor ambiental d'esta parte de la costa y reconoz l'impactu paisaxísticu "irreversible" que produciría nella "una proliferación de les víes de penetración". El mesmu testu diz que "el valor paisaxísticu del área veríase emporcao pola estensión de les zones urbanes fuera de los núcleos de población". Según la Coordinadora Ecoloxista, el campu de golf valta tamién la Normativa Urbanística en vigor en cuantes que la llei manda que'l "suelu non urbanizable de costa" solo se permite usalo pa "usos agrícoles y forestales que nun comporten edificación". Pa más aquello, parte de les 100 hectárees en que tendría de facese'l campu de golf son dafechu llugares que l'Alministración del Principáu tien propuestes énte la UE como posibles "Llugares d'Importancia Comunitaria" dientro de la rede Natura 2000.

A nivel políticu, el campu de golf nun se recibe cola mesma allegría según en qué estamentu. L'alcalde de Cuideiru Francisco González, que va dos años clamaba contra la estracción d'arena del Cabu Vidíu pol so dañu mediuambiental, celebra la llegada de Landmark International ensin condicionantes mediuambientales y declara que la empresa fai proyectos de tan "na élite mundial" mientres defende que los más de cien xalés diben ser una "prolongación de lo que ye agora Ouviñana. Pela so parte, la Conseyería d'Urbanismu, pela que pasa'l preste a la instalación, nun ye tan optimista, y el Conseyeru Francisco Buendía yá dixo que'l proyectu va tener como mínimo que facer "cambeos" pa concueyar cola llexislación. La pega técnica más grande nesti sentíu vien polos dos hoteles, que'l proyectu asitia talamente no que ye zona protexida y mui allegaos a los cantiles.

El cabu Vidíu va siguir onde ta munchos sieglos más de los que yá lleva, pero los usos del paisaxe, hasta agora dedicáu a actividaes del sector primariu, puen camudar radicalmente d'equí a la vuelta d'unos meses. El futuru más inmediatu tien la palabra, pa bien o pa mal.