Video de Corquiéu n'Italia

Güei ufiertamos a los nuesos llectores la posibilidá de ver un video del grupu asturianu "Corquiéu".

El video en cuestión ye d'una actuación en directo de la banda'l pasáu mes de xunetu nel festival "Concertiscaligeri" en Verona, Italia. Ellí compartieron cartel con bandes como "Flook" o "Fred Morrison y Jamie Mcmenemy", colo qu'a la fin teníemos n'Italia un cartel de la que podía ser una nueche folk n'Asturies, yá que tantu "Flook" como Morrison y Mcmenemy anden tocando muncho per Asturies d'un tiempu p'acá. De toes maneres, la organización del Festival tuvo la perbona idea de grabar y colgar na so web partes de les sos actuaciones, esti ye l'enllace al traviés del que se puede llegar hasta'l video de "Corquiéu". Con too y con ello nun solo vamos topar el video de los asturianos, tamién hai videos ente otros de "Fred Morrison y Jamie Mcmenemy", y de los ingleses "Flook", que van actuar la selmana qu'entra en Llanes, como yá adelantamos Asturies.com va unos díes.

No que cinca a los proyectos de la banda de Ribesella, anque lleva un añu andando per bien de sitios, Escocia, Italia, Bélxica...etc, entá nun quieren descansar y van facer una xira per Bélxica y Holanda. Ellí, el grupu de la cantante Gema García, van echar seis conciertos dende'l 16 de payares hasta'l 21 del mesmu mes que de xuru van prestar abondo al so públicu.