Floxu partíu'l disputáu esti domingu nel Tartiere nel que L'Uviéu s'impuso al Llanes por 1 gol a 0. L'Uviéu ganó, pero fízolo ensín xugar bien y solo pola inercia que marca la superioridá na calidá del so equipu.
Nunca nun convenció'l xuegu del equipu carbayón, que xugó la peor primer parte dende va tiempu.
Los primeros 45 minutos tuvieron marcaos pol total dominiu del Uviéu pero ensin ocasiones clares de gol. Un aburrimientu completu con solo una ocasión, una falta perbien tirada por Xandru a la que Toni-y dio una maxistral rempuesta.
Víno-y bien el descansu al Uviéu que salió na segunda parte con muncha más fuercia y verticalidá, lo qu'orixinó abondes ocasiones. Nuna d'éstes y namás salir al campu, Yeray combinó con Borja que centró al área onde, tres un rebote defensivu Aldeondó mandó'l balón a la rede.
D'equí al final el Llanes abrió llinies, pero ésto nun-y sirvió pa tener más ocasiones sinón que propició que l'Uviéu tuviere munches más xugando a la contra. Un datu: el Llanes fizo'l so primer y únicu disparu a puerta nel minutu 45 de la segunda parte, poco pa poder puntuar en nengun campu.
En definitiva, l'Uviéu sigue ganando pero ensin xugar bien, y ésto a la afición entama a nun presta-y. Diba tiempu que nun s'oyíen pitos nel Tartiere, y ayeri sí se sintieron. Avisu pa navegantes, l'afición da muncho créditu al equipu pero hai de responder con bon xuegu dacuando, tampoco paez que l'horariu impuestu pola mor de la tresmisión televisiva ayude, yá qu'ayerí descendió'l númberu d'asistentes al campu.