Vicente Gotor inaugura les XXXI Xornaes Internacionales d’Estudiu

|

Les XXXI Xornaes Internacionales d’Estudiu de l’ALLA van inaugurase esti martes cola presencia de Vicente Gotor. Per tres díes, dellos espertos van dar ponencies y protagonizar comunicaciones alredor del asturlleonés.

L’entamu de les xornaes va tener llugar a les 16 hores cola intervención del rector de la Universidá d’Uviéu, que va tar acompañáu por Ana María Cano, presidenta de l’Academia de la Llingua Asturiana (ALLA), y por Cristina Valdés Rodríguez, decana de la Facultá de Filosofía y Lletres, onde se desendolquen toles charres y presentaciones. Darréu, l’ex presidente de l’ALLA, Xosé Lluis García Arias, va dar la ponencia inaugural, que tien como títulu ‘Conciencia llingüística y testos medievales nel Dominiu Ástur’.

Esta primer xornada complétase coles comunicaciones ‘El léxicu mineru. Dalgunes cuestiones etimolóxiques’, de Lucía Cortina; ‘La estensión de los plurales -es, -en en Senabria’, de Xuan Xosé Lajo; y ‘Venceyamientu de les variantes de la llingua y otres llingües: análisis multivariante pente medies d’algoritmos xerárquicos’, de Rubén Fernández Martínez, pa pesllar esti bloque con un alderique y una posa. Tamién va haber tiempu pa dos ponencies: ‘La entonación asturiana nel marcu de les llingües romániques’, de Carmen Muñiz Cachón (Universidá d’Uviéu), y ‘“Abril buenu era si el gallegu non viniera”. Distribución geoparemiológica de refranes meteorológicos’, de Xosé Afonso Álvarez Pérez (Universidade de Lisboa). Pa zarrar l’actividá nel salón d’actos de la Facultá de Filosofía y Lletres, l’ALLA va presentar la edición dixital del ‘Lletres Asturianes 107’ y la revista dixital ‘Ciencies. Cartafueyos de Ciencia y Teunoloxía 2' nun actu nel que va participar María Paz Suárez Rendueles, vicerrectora d'Investigación y Campus d'Escelencia Internacional de la Universidá d'Uviéu.

Participación de l’Acadèmia Valenciana de la Llengua

Nos dos díes restantes el volumen d’actividaes va ser similar, cola presencia destacada d’espertos procedentes de Francia, Catalunya o Andalucía. Tamién va tar n’Uviéu Ramon Ferrer, presidente de l’Acadèmia Valenciana de la Llengua, que mañana, a les 20.15 hores, va presentar xunto con Cano ‘Tirán el Blancu’, novela caballeresca en valencianu –de nome orixinal ‘Tirant lo Blanch’– escrita por Joanot Martorell nel sieglu XV, coeditada poles dos instituciones académiques y traducida al asturianu por Pablo Suárez García.

 

Contador Estadistiques