Vetu y solidaridá con Radio Sele

Los compañeros nes llabores informatives de la emisora uvieina Radio Sele sofrieron esti fin de selmana un episodiu llamentable y surrealista al nega-yos la directiva del Astur CF el permisu p'acceder al estadiu Hermanos Llana pa radiar el partíu qu'enfrentaba a los locales col Real Uviéu. En vista de lo que taba asocediendo ellí, los demás medios presentes pa cubrir l'alcuentru decidieron solidarizase colos espiquers de Radio Sele y abandonaron l'estadiu, que la emisora n'asturianu acabó radiando dende los aleros del Carlos Tartiere, estadiu qu'atiesta col Hermanos Llana.

Según esplicó a Asturies.com Nacho Rodríguez, ún de los miembros del equipu de deportes de Radio Sele, "la emisora pidiere acreditación pa trés persones a la directiva del Astur, comose fai siempre dende Radio Sele con tolos estadios onde xuega'l Real Uviéu". Colo que nun contaba l'equipu de la emisora cuando se presentaron el día del partíu na puerta del Hermanos Llana, yera con que Luis Refusta, responsable de rellaciones del equipu, diba dici-yos que namás podíen dexar pasar a una persona por parte de Radio Sele. Ënte la quexa del equipu radiofónicu, qu'esplicó que taben acutaes trés acreditaciones, el responsable del ACF retrucó que'l campu "ye nuestru y dexamos pasar a quien nos paez"

Anque según Nacho Rodríguez la discusión foi amable y nunca se llegó a dar voces nin enfocicase, énte les referencies que-yos fizo Luis Refusta a l'equipu de la emisora qu'emite n'asturianu dende 1984 sobre'l tratamientu informativu que gasta radio Sele col Astur C.F.
convidóse al dirixente del Astur a que cualquier quexa que tuvieren contra la emisora la formularen nun xulgáu. En vista de que tolos demás medios entraben ensin problema nengún al interior del "Hermanos Llana" l'equipu de Radio Sele decidió a la fin dir a radiar l'alcuentru dende les grades del Carlos Tartiere, preparaes aquel día pa que l'afición del Uviéu pudiere ver el partíu nel campu vecín.


L'incidente motivó una fola de solidaridá por parte de los demás medios presentes, y los corresponsales de Marca, La Voz de Asturias, Onda Cero y los responsables de la web oficial del Real Uviéu ente otros, decidieron tamién abandonar l'estadiu, cubriendo'l partíu dende la grada del Carlos Tartiere, onde tuvo tamién el collaborador d'Asturies.com nos partíos del Real Uviéu, Eloy Antuña.

La valoración que fai Nacho Rodríguez de lo qu'asocedió nel Hermanos Llana ye mui negativa, pero'l periodista de Radio Sele sorraya que "nun-y estrañen estos comporamientos por parte de persones como Luis Refusta y del presidente del club Isaac Peral, que yá enantes de dirixir l'Astur CF yeren les cabeces visibles de la plataforma "patrimonio azul" que se dedicaba a poner enzancos nel andar del Real Uviéu" .

L'añu pasáu, con motivu del descensu a tercera del Real Uviéu, Peral y Refusta pasaron a dirixir el Astur CF dientro d'una operación apadrinada pol alcalde uvieín Gabino de Lorenzo, persona enfrentada siempre cola directiva del Real Uviéu y qu'intentó entós montar un equipu paralelu al traviés del Astur CF, históricu del fútbol base carbayón. Añu y mediu dempués, el ACF, que llegó a camudar la so camiseta encarnada por otra azul sonsañando la del Real Uviéu, anda restolando pela metada de la tabla de tercera división con una afición mui menguada y yá ensin el sofitu espresu de l'alcalde, mientres que'l Real Uviéu, líder de la categoría, tien el sofitu de más de 11.000 socios.