Veranu estráu de repetidores

Cola llegada del veranu, les compañíes de teléfonos móviles tan faciendo una campaña pa instalar más antenes nos teyaos de les cases, según denuncia la Coordinadora Ecoloxista d'Asturies, que-yos recuerda a los conceyos la obligación de cumplir coles ordenances urbanístiques sobre instalación de repetidores

Según argumenta'l grupu conservacionista, les empreses tan centrando la campaña d'instalación de nueves antenes en llugares onde yá hai un gradiente altu d'emisión de radiaciones. La esistencia d'una xurisprudencia del Tribunal de Valladolid qu'afita'l calter de "actividá clasificada" de la instalación d'estos repetidores val-y tamién a la coordinadora Ecoloxista pa denunciar que la instalación d'antenes de telefonía tien de pasar per trámites d'información pública que nun tan faciéndose. Grave enforma ye pa los ecoloxistes el fechu de que nes trés mayores ciudaes del país, Uviéu, Avilés y Xixón, s'intentare estos meses poner repetidores de telefonía móvil a menos de 300 metros d'escueles, distancia mínima que manden les ordenances y amás col agravante de que nun se-yos dio parte a les comunidaes de vecinos de la redolada.

Por too ello, y como recordatoriu, la Coordinadora Ecoloxista apurre un estoyu de midíes llegales y disposiciones básiques sobre'l tema en casu de que se reciba una ufierta pa mangar repetidores de telefonía móvil. En primer llugar, ye preciso que tola comunidá de vecinos acepte por unanimidá la instalación de l'antena, de la que pasen a seer pasan a ser responsables civiles subsidiarios nel momentu en que s'instale.

La Coordinadora recuerda tamién que ye mui recomendable revisar les condiciones del contratu enantes de firmalu y esixí-y a la operadora un seguru de responsabilidá civil que cubra daños materiales y posibles daños de salú que se deriven de les emisiones de radiación.