Venti títulos de directores asturianos nel Festival de Cine de Xixón

El Día d'Asturies, que'l Festival de Cine acuta pa les producciones del país, va presentar una bona riestra de producciones, mientres que la cinta "Nenyure" de Jorge Rivero, va competir na sección oficial. El certame entama esti día 25

Jorge Rivero, Primer Premiu de Nuevos Realizadores d'Asturies nel añu 2003 va competir pol Premiu al meyor curtiu na Sección Oficial absoluta a concursu del Festival de Cine de Xixón. En diez minutos de cine, ensin actores y con una voz n'off, Rivero fai un poema de señaldá nel barriu obreru de Mieres onde se crió l'autor. La perda d'identidá d'esti espaciu, la identificación col mesmu y la presencia de l'arquitectura como elementu definitoriu del paisaxe son los elementos claves de "nenyure" un curtiu que'l mesmu Pablo Rivero define como "un poema visual onde les fachaes, les solombres, les ruines y los demás elementos del paisaxe asumen completamente'l protagonismu, y onde la voz y la música tan al sirviciu de da-yos más claridá a los significaos de les imáxenes". La gala de clausura tamién va contar con presencia asturiana al traviés del curtiu de Tomás Fernández entituláu "El Pozu"

D'otra manera, la 42 edición del Festival presenta diez curtios a competición dientro del "Día d'Asturies" una cifra qu'a falta de conocer la calidá de los títulos, france la seca de producciones del 2.003, cuando namás se presentaron trés películes.

Ente los títulos que compiten anguaño ta "Adolf 474", na que Ricardo Fernández Peña narra al traviés del testemuñu de los que lu conocieron, la vida d'Adolf, llegáu a esti mundu con un cuerpu de 100 años que, en cuenta d'avieyar, remocica colo tiempu. Pela so parte "Ego" de Javier González Bernardo, ye una historia metafórica animada por ordenador sobre la tresformación del alma humano. En "Gritar", Carlos Navarro trata'l tema de la falta de comunicación. Otru de los títulos a concursu nesti "Día d'Asturies" ye "Nada personal" d'Elena Tamés que cuenta la hestoria d'un matrimoniu en crisis. Bruno Mateos axunta cine y pintura en "Raya", onde dos pintores esploren les posibilidaes de la perspectiva y del color

El viaxe inciertu d'Iraida Lombardía en "Bon/Boyeur", la muerte de la espontaneidá en na observación que Francisco Deborja presenta en "Amáquina", la soledá de Paulino Ibáñez en "La casa vacía" y "Maria Luisa", de Patricia García Quesada, completen la llista de títulos a competición nel Día d'Asturies, nel que tamién va haber un pase especial a cargu d'Amanda Castro y la so cinta "Tierra de guerrilleros", que con guión de Pedro Alberto Marcos, director del centru de TVE n'Asturies, cuenta l'alcuentru fantásticu ente dos figures asturianes de la llucha guerrillera, d'una parte' socialista José Mata Castro y d'otra'l cura sandinista Gaspar García Laviana.Dos personaxes distantes nel tiempu y nel espaciu pero los dos nacíos na Güeria Carrocera.

El programa del Festival inclúi fuera de competición, los curtios "Gigia", d'Antonio Linares; "Los intelectuales", de Rafael Martínez del Pozo; "Maletango", de Pedro Antonio Curto; "Náufragos", d'Imanol Ruiz de Lara y "Nablús, la ciudad fantasma", d'Alberto Arce. Fuera de concursu van proyectase tamién los curtios ganadores del certame "nun nos cuentes películes, failes" concursu empobináu a mozos de16 a 23 años y que ganaron los proyectos "A la cola" y "Por tí". El primeru quier dar una visión de la situación d'Asturies y la emigración xuvenil, pa lo que se cuenta colos testimonios de Gustavo Bueno o Arturo Fernández, mientres que "Por tí" quier dar una visión positiva de la mocedá asturiano dende la perspectiva d'un periodista.

Xunta los curtios, la sección "Llendes" del festival va presentar dos llargos. "Medrana", primer llargu de Juan Luis Ruiz, preséntase como un documental nel que se retrata la crisis y l'allancamientu del campu asturianu. D'otra parte, el conocíu escritor y periodista Ramón Lluis Bande va facer nel Festival la estrena del so proyectu documental sobre la figura d'Aida la Fuente, la "rosa encarnada"de la revolución asturiana, pal que'l director contó col testemuñu de Pilar, la última hermana viva de la histórica figura de la revolución asturiana.