Venti incendios amburen Asturies

Diez conceyos del país tán afeutaos por venti quemes, lo que llevó al Gobiernu a activar l’INFOPA en nivel 1 p’Ayande y Ibias y en 0 pal restu d’Asturies. Les raches d’aire y les altes temperaturas nun ayuden a la estinción d’estos fueos.

Según el comunicáu del 112 Asturies de les 13.44 hores, los conceyos afeutaos poles llames son Ayande (Villalaín), Cabrales (Berodia y Ḥortigueru), Cangas del Narcea (Monesteriu), Corvera (El Sucu), Ibias (Valvaler y Ferreria), Llanes (Purón, Buelna, Rales, Buda, La Galguera, Vidiago, Andrín y Pielasierra), Sobrescobiu (Villamoréi), Tinéu (Colinas de Riba), Valdés (Las Murias y Concernosu) y Villayón (El Couz).  D’ellos, la situación más complicada foi la que se vivió en Villalaín y en Valvaler, pola so cercanía con viviendes, pero’l llabor fechu pol Serviciu d’Emerxencies del Principáu d’Asturies (SEPA) esta madrugada evitó que se vieran afeutaos estos núcleos poblacionales.

Nos trabayos d’estinción trabayen efeutivos de Bomberos SEPA, empreses y cooperativas forestales, guardería del Principáu d’Asturies y les BRIF de Tinéu y Ruente (Cantabria). No que se refier a medios aéreos, nestos momentos hai cuatro helicópteros n’aición nel país.