Vecinos y ecoloxistes celebren la paralización de les llinies d'alta tensión asturianes

La espublización nel BOE del llistáu de 88 proyeutos enerxéticos que’l Gobiernu considera imprescindibles foi celebrada pola Plataforma d’Asociaciones contra la Llinia d’Alta Tensión Costa Verde. Nengún d’ellos ye asturianu.

D’esta forma, amás de la llinia Costa Verde tamién quedaríen paralizaes Sama-Velilla y Boimonte-Pezós, según consideren ecoloxistes y vecinos, que lleven bien d’años lluchando contra estes instalaciones. “La cayida acusada de la demanda de lletricidá producida nos años últimos, amás de los cambios nes previsiones de la evolución del PIB a mediu plazu y la necesidá d’aforrar gastos xenerales pola crisis, obligó a una revisión profunda de la Planificación de los Sectores de Lletricidá y Gas 2012-2020. Namái caltuviéronse aquellos proyeutos venceyaos cola ‘seguridad del suministru’, si supón ‘un impautu económicu negativu nel sistema llétricu’ o si resulten ser proyeutos estratéxicos pal conxuntu del Estáu. L’ aniellu d’alta tensión Costa Verde defendíu por Red Eléctrica paez que nun cumple nengún d’estos requisitos y la so construcción queda por tanto paralizada, yá que’l Real Decretu 13/2012 suspende autorizaciones nueves”, espliquen dende la Plataforma d’Asociaciones contra la Llinia d’Alta Tensión Costa Verde. Sicasí, esta decisión del Gobiernu estatal que paraliza la planificación enérxetica anterior nun quier dicir que nun futuru nun tornen a reactivase, polo qu’esti coleutivu asegura que va mantenese n’alerta.

La llinia Costa Verde proyeutaba pasar per Gozon, Carreño, Xixón, Sariegu, Siero, Nava y Bimenes, onde coneutaría cola Soto-Penagos. “Según el proyeutu proporcionáu por Red Eléctrica Española, esta llinia d’alta tensión de 400kV de circuitu doble resultaba ser una instalación estructural indispensable pa la seguridá del suministru llétricu. Agora demuéstrase que nun yera ciertu, yá que, según consta nel BOE, la razón fundamental pa eliminar instalaciones yá proyeutes enantes foi la desestimación de la so utilidá”, afirmen dende esta plataforma conformada polos coleutivos siguientes: l’Asociación de Vecinos El Remediu, la Plataforma Bimenes conta l’Alta Tensión, l’Asociación de Vecinos El Peñón de Fano, l’Asociación de Vecinos de Valdornón, l’Asociación de Vecinos de Serín, l’Asociación de Vecinos San Juan de Bautista de Ceis, l’Asociación de Afectados por la Línea de Alta Tensión a 400KW Denominada Costa Verde del Altu la Madera, l’Asociación de Vecinos La Magdalena de Ruedes, l’Asociación de Vecinos de Vega-La Camocha, el Centru Social Autoxestionáu La Semiente, la Coordinadora Ecoloxista d’Asturies, l’Asociación Asturiana d’Amigos de la Naturaleza y l’Agrupación de Colectivos Asturianos.