Vecinos y ecoloxistes aleguen contra l'embalse de Caliao

Vecinos del Altu Nalón y representantes de les principales asociaciones ecoloxistes d'Asturies que s'axunten na Plataforma pola Defensa del Parque Natural de Redes, van presentar esta mañana na Conseyería de Mediu Ambiente, Ordenación del Territoriu y Infraestructures una alegación conxunta al proyectu de Plan Rector d'Usu y Xestión del Parque Natural de Redes, solicitando que se declare como usu non permitíu nel Parque Natural de Redes la construcción d'embalses nuevos, una midida cola que se torgaría la construcción del embalse de Caliao (Casu).

El proyectu de Plan Rector del Parque, qu'agora mesmo ta n'información pública considera la construcción d'embalses como usu non permitíu en xeneral, pero dexa una puerta abierta a los que tean enxertos na planificación hidrolóxica nacional, ello ye, l'embalse de Caliao. Según les asociaciones ecoloxistes, l'embalse de Caliao ye una de les amenaces más series que pesen sobre'l Parque de Redes. Los conservacionistes califiquen de "mui altu" l'impactu ambiental d'esti embalse, lo mesmo na so fase de construcción que na d'esplotación, pa lo qu'aporten datos sobre les especies afectaes. Animales como'l faisán montés, que ta en trámite de declarase especie en peligru d'estinción, la llóndriga, l'osu o'l llobu taríen afectaes directamente pola construcción del saltu, lo mesmo que los ecosistemes enteros, y ye que'l proyectu d'embalse cuenta con inundar cinco kilómetros de ríu, qu'incluyen praos, carbayeres, un llugar y dellos elementos de patrimoniu cultural, según se fai constar n'alegación.

Pa da-y más pesu al documentu,los ecoloxistes y vecinos amiesten que la construcción del saltu en Redes contradiz testos llegales sobre espacios naturales ente los que citen la Directiva Hábitats, la Directiva Aves, la Llei 4/89 de conservación de los espacios naturales y los mesmos oxetivos de la Llei de declaración del Parque Natural de Redes.

La pitición del documentu que va entregase güei resúmese na solicitú de que se desanicie'l puntu 17.3.9 del Plan Rector d'Usos y Xestión del Parque, que ye onde diz que podría construyise l'embalse xunto con una escepción sobre preses prevista nel Apéndiz II y una "escepción a nuevos aprovechamientos hidroeléctricos" prevista nel separtáu 16.1.

Les asociaciones ecoloxistes y los vecinos van presentar col documentu d'alegaciones más de 700 firmes de particulares y d'asociaciones, munches d'elles correspondientes a habitantes de Caliao y del restu del Parque.