Vecinos de Mieres, contra la térmica de La Perea

17 de les 31 asociaciones de vecinos del Conceyu de Mieres van presentar un escritu d'alegaciones en Delegación del Gobiernu nel que-y esixen al Ministeriu de Mediu Ambiente que nun-y dea'l preste a la empresa Endesa pa que lleve alantre la central térmica a ciclu combináu de gas que tien proyectada en La Perea, onde yá ta asitiada una central térmica esperimental propiedá de la empresa estatal minera Hunosa.

Lo cerca que diba tar esta instalación enerxética de los pueblos y llugares que l'arrodien ye'l principal argumentu que dan los vecinos pa refugar la térmica, de 400 mw,amás de la contaminación que va llevar arreyada la fábrica. Los vecinos de Mieres albidren tamién que va existir posibilidá d'accidentes, y píden-y a la conceyala delegada de la estaya de Mediu Ambiente Clementina Carreño, que-yos dea esplicaciones y datos sobre'l proyectu y sobre les midíes correctores sobre l'entornu que van adoptase en casu de llevase alantre.