Vecinos de Grau denuncien a ALSA por nun cumplir col serviciu

Ocho asociaciones culturales y de vecinos del Conceyu de Grau que representen a más de 1300 socios emitieron ayeri un comunicáu en que dan anuncia de la presentación d'una quexa formal énte'l Consorciu de Tresportes d'Asturies, el Conceyu de Grau y la mesma empresa ALSA por abandonar el serviciu de coches de llinia con paraes qu'atendía a más de trenta llugares del conceyu pela carretera n-634. Les asociaciones denuncien que dende'l 6 de xineru y ensin avisu, ALSA ta llevando los autocares pela autopista, franciendo 50 años de serviciu concedíu pola alministración.

La quexa fírmenla les asociaciones Baracaxu, Santo Medero, Santa Apolonia, La Texedora, Sona, Plataforma Pro Santa Maria, San Xuan de Peñaflor, y San Xuan de
Villagarcia, que denuncien que son más de 1500 persones les que se ven afectaes por esta decisión qu'aseguren que la empresa tomó pela so cuenta y ensin consulta denguna. Les parroquies y llugares afectaos son Berció, Fuexu, Báscones, Borondes, Belandres, La Casuca, Casas del Monte, Veiga Peridiellu, La Teyera, Reconcu,La Veiga Vayu, Sumines, Nalió, Santa Maria, Nores, Castaños, Casanueva, Llauréu, Anzu, Sistiello, Peñaflor, Los Arellanes y El Colláu ente otros.


Les asociaciones, qu'esixen qu'ALSA reponga'l serviciu, llamenten que se pasare de tener coche de llinia cada hora a nun tener nengún en tol día y califiquen la situación de "vergoña" y de "discriminación" acusando a ALSA de "falta de respetu" a los que foron "los sos primeros veceros" y "los qu'ayudaron a facer d'Alsa lo que ye anguaño".