Vecinos de Blimea amiéstense a la campaña contra’l banzáu de Caliao

L'Asociación de Vecinos de la Parroquia de Blimea, en Conceyu de Samartín del Rei Aurelio, ún de los conceyos pelos que pasa'l Ríu Nalón, amestóse a la campaña contra la construcción del embalse que'l Gobiernu asturianu pretende facer ríu arriba, en conceyu Casu, y que tien la refuga unánime de tol movimientu ecoloxista asturianu.

Nel comunicáu oficial en que dan anuncia de la so refuga al embalse de Caliao, los vecinos de Blimea denuncien tamién que l'ente públicu del agua CADASA nun apurre agua tratao namás qu'a L'Entregu y que bien de parroquies del conceyu, casu de Blimea o Sotrondio reciben agua ensin más tratamientu que'l de la cloración. Los vecinos de Blimea denuncien l'agraviu comparativu que-yos supón el fechu de que dende Confederación Hidrográfica y CADASA "se muestre una sensibilidá especial col abastecimientu d'agua a la zona oriental de la nuestra comunidá y sobremanera col so mediu ambiente" en referencia a les declaraciones en que'l Xerente de CADASA Alberto Álvarez Rea daba anuncia de de qu'abastecer col agua del Ríu Seya a los conceyos del oriente d'Asturies "yera impensable pol calter emblemáticu que tien esti ríu" argumentu col que quería da-y más xacíu a la construcción del embalse de Caliao.