Vaski va recibir un homenaxe del mundu del béisbol nel so partíu caberu como xugador d’El Llano

|

José Luis Bailón Tomás ‘Vaski’, xugador d’El Llano Béisbol Club dende la so fundación nel añu 1986, va disputar el sábadu contra l’Astros el so partíu caberu. El so equipu y el mundu del béisbol va aprovechar pa face-y un homenaxe.

L’eternu númberu 9 d’El Llano, qu’entró na disciplina del club en categoría cadete y col que ganó la Copa nel 2008, va ser el pitcher abridor del primer de los dos partíos qu’enfrenta a los xixoneses esta fin de selmana col Astros valencianu. Asina, tres llanzar al primer batedor contrariu, el xuegu va parar per diez minutos pa proceder a esti homenaxe nel que participen la Federación de Béisbol y Sófbol del Principáu d'Asturies, la Real Federación Española de Béisbol y Sófbol, el Conceyu de Xixón y la Direición Xeneral de Deportes.

Tres esti actu, el partíu va continuar con normalidá. Nél El Llano va tratar de sumar la so primer victoria de la temporada tres perder nes dos xornaes iniciales colos potentes Pamplona en casa (3-11 y 1-11) y col campeón actual de Lliga y Copa y líder invictu, el Tenerife Marlins, en Canarias (14-0 y 15-0). El primer partíu, el del homenaxe a Vaski, va principiar a les 16 hores nel campu de la Llaboral, mentes que’l segundu va tener llugar el domingu a les 11 hores,. El Llano espera una bona entrada nos dos choques, sobre manera nel primeru, yá que convidó a 100 xugadores mozos de béisbol, que van recibir un refrescu y un perrín caliente mientres l’encuentru. La entrada ye de baldre.

L’equipu sub-16, a Praga

El Llano sub-16 va participar nel campeonatu de la Pony League tres recibir una invitación de la organización. Los xixoneses, primer equipu estatal que va xugar nesti tornéu con sede en Praga, van lluchar pol trunfu contra otros 15 clubes de toda Europa y seleiciones como la checa, la israleina o l’Academia Alemana.

 

Contador Estadistiques