Van celebrase en payares los 30 años de Conceyu Bable

L'asociación que ente 1974 y 1981 foi'l guañu de la reivindicación llingüística y asturianista va ser oxetu d'un homenaxe esti mes de payares.

En 1974, la revista "Asturias Semanal" que representaba'l periodismu más progresista de l'Asturies de la época ,entamaba a acutar un espaciu toles selmanes pa los escritos y comunicaos d'una nueva organización creada n'ambientes universitarios: "Conceyu Bable" La primer organización asturianista de la transición tenía na reivindicación del idioma asturianu'l puntu principal del so discursu, faciendo propies conseñes como "bable nes escueles" y "asturianu fala la to tsingua". Cola cayida del franquismu, CB convirtióse nuna organización con abonda fuerza y implantación que plantegaba como oxetivu cimeru la creación de l'Academia de la Llingua Asturiana, cosa que se consiguió en 1981. Darréu d'ello, CB desfízose adulces, marchando munchos de los sos militantes pa otres organizaciones de signu más políticu o sindical, anque Conceyu bable nunca nun llegó a desapaecer, sobreviviendo hasta agora, anque de manera simbólica.

Agora, trenta años dempués, un grupu d'antiguos militantes quieren facer una serie d'actividaes n'alcordanza d'aquellos años. Cuenten pa ello col interés de la Oficina de Política llingüística del Principáu y de la oficina de la llingua de Xixón. Estos díes tan faciéndose les primeres reuniones preparatories, y anque entovía ye ceo pa saber el programa d'actividaes, sábese que la fecha cola que se trabaya ye la del mes de payares.