Valledor: "Ye imprescindible un nuevu proyectu políticu asturianu"

L’ex diputáu d’Izquierda Xunida, Francisco Javier García Valledor, argumenta nuna carta unviada al Conseyu Políticu d’IX les razones de la so baxa como militante. Discrepa “de fondu” con IX y nagua por un nuevu proyectu políticu.

Tres militar dende 1976 nel PCE y cumplir cargos de responsabilidá pública n’Izquierda Xunida, l’ex diputáu y ex conseyeru de Xusticia, Francisco Javier García Valledor, dióse de baxa definitiva de la so antigua formación política. Ye’l pasu final tres del abandonu “por coherencia” del so escañu na Xunta Xeneral, n’avientu del añu pasáu.

“Considero qu’anguaño prodúzse una discrepancia de fondu col proyectu políticu nel que milité”, esclaria Valledor na carta empobinada al Conseyu Políticu d’IX, na qu’argumenta que discrepa d’esta formación pol aspectu “coyuntural” y “estratéxicu”.

“IX ta xugando nun gobiernu cola FSA na qu’amás d’incumplimientu escandalosu de los insuficientes alcuerdos programáticos, acéptase de facto les consecuencies regresives, social y económicamente, de les polítiques qu’impuso el Gobiernu de Zapatero”, manifestó Valledor en cuantes a la discrepancia “coyuntural” con IX.

Sobre’l aspectu estratéxicu, Valledor consideró qu’Asturies necesita un cambiu políticu tres los sucesivos gobiernos de la FSA. Na mentada carta, l’ex diputáu diz que’l “llimitáu autogobiernu ye un Réximen políticu que ye necesariu frañir p’acabar coles redes clienterales que se construyeron al rodiu de la FSA y los sos gobiernos”.

Proyectu políticu “imprescindible”
Valledor tamién reprochó a los sos antiguos compañeros que “la refundación d’IX resultó ser un trámite o un paripé”, y opinó que “ye imprescindible un nuevu proyectu políticu asturianu”.

“Creo nun proyectu unitariu, d’una izquierda ecoloxista y un partíu asturianu. Y voi ayudar no que puea a qu’eso puea consolidase”, declaró l’ex militante d’IX a ASTURIES.COM. A la par, esclarió que la so decisión ye “personal” y cree que “nun va haber un ‘aluvión’ de xente d’IX” que comparta esi proyectu.

Tamién, en declaraciones a Europa Press, Valledor aseguró que les conversaciones pa esi futuru proyectu políticu yá se tán dando y, preguntáu por si tenía en mente encabezalu, opinó qu'en nengún casu ha tar basáu en "personalismos" y esplicó que "cuando seya'l momentu", les persones que decidan llevalu alantre van decidir.