Valledor tamién condena l’actitú del rector

Tres de la rueda de prensa que dio ayeri Rafael palacios, Director Xeneral de Cooperación na que citóa tolos medios de comunicación pa espresar el malcontentu de la so estaya de gobiernu cola actitú del Rector de la Universidá Juan Vázquez por nun almitir tésis doctorales n'asturianu, el Conseyeru d'asuntos Esteriores y Xusticia Javier Valledor tuvo tamién dende Bruseles, onde s'alcuentra estos díes, palabres condenatories pa col máximu responsable de la institución académica. Valledor calificó l'actitú del rector de "inxustificable" y alvirtió de que pue tar faltando con ello a la llexislación vixente. Valledor diz qu'autonomía universitaria "nun quier dicir impunidá universitaria" y que nun puede llegase a una situación como la d'otru tiempu en que les lleis xenerales nun mandaben dientro de les muries de la universidá.