Valledor distingue a los collaboradores de la emigración

El Conseyeru de Xusticia, Seguridá Pública y Relaciones Esteriores, Francisco Javier García Valledor, acompañáu del Director de l'Axencia Asturiana d'Emigración, Luis Miguel Fernández Romero, va presidir l'actu, organizáu pola Conseyería y la propia Axencia d'Emigración col envís de recibir y distinguir a los artistes, músicos y collaboradores cola emigración asturiana qu'a lo llargo l'añu 2004 llevaron la nuestra cultura, la nuestra etnografía y el nuestru folclor, al traviés de tol mundu, ellí onde hai centros, cases y grupos d'emigrantes asturianos y asturianes.

L'Actu de Distinción a los Artistes y Músicos Collaboradores cola Emigración Asturiana 2004, quier ser un cambéu de formes a la hora de tratar el reconocimientu a la xente del folclore y de la cultura de raigañu asturiana, porque'l so llabor nun ye siempre comprendíu y muncho menos reconocíu polos propios asturianos que viven n'Asturies.

La Conseyería de Xusticia, Seguridá Pública y Relaciones Esteriores qu'encabeza'l Conseyeru Valledor y el so Director d'Emigración, Luis Miguel. Fernández Romero, van tar presentes y van apurrir personalmente les distinciones a les venti bandes de gaites y a los más de cincuenta grupos de baille, coros astures, bandes de folk, grupos de teatru, cantantes de tonada y otros collaboradores de la emigración qu'a lo llargo l'añu 2004 caltuvieron encesa l'asturianía y del asturianismu nos cinco continentes. Ellos son los que sofiten esa unión que l'artista Astur Paredes simboliza al traviés del Páxaru Atlantis qu'axunta dos orielles o dos puntos na distancia, na nueche y que va ser la obra que van recibir tolos distinguíos de manes de Valledor.